Dhuna ndaj grave në Kosovë, aktivistët: Shteti kujdeset më shumë për dhunuesin se për viktimën

Fenomeni i dhunës ndaj grave në Kosove vazhdon të jetë shumë i pranishëm. Rasti i fundit i bërë publik, ku një burrë, i shoqëruar edhe nga bashkëshortja e fëmijët, godet një grua tjetër në supermarket, ka rikthyer vëmendjen mbi këtë anomali sociale.

Për shoqatat që e trajtojnë këtë fenomen, akoma më tronditës është fakti se institucionet dhe shteti me shumë kujdesen për dhunuesin se sa për viktimën.

Liridona Sijarina nga Qendra Kosovare për Studime Gjinore thotë se lind nevoja që jo vetëm shoqëria të ndërgjegjësohet për të mos pranuar dhunën ndaj grave, por duhen reformuar edhe ligjet,

Kjo tregon që ende institucionet tona po qeverisen nga një mendësi patriarkale që nuk e sheh të rëndësishme sigurinë e grave, nuk e sheh të barazvlefshëm trupin e grave me të burrave dhe po mirëmban këtë dhunë që ka qenë e tolerueshme në shoqërinë tonë”, tha Liridona Sijarina.

Sipas saj, edhe pse ne aspektin ligjore ka ndryshime pozitive, problem mbetet zbatimi i tyre. 

Aktivistja Sijarina thotë se këto lëvizje të vogla pozitive kanë ardhur si rezultat i aktivizmit, që po ashtu ka ndikuar edhe në rritjen e numrit të raportimeve të dhunës ndaj grave. Këto shifra, sipas Sijarinës, megjithatë nuk e paraqesin situatën reale, pasi sipas saj, ky problem mbetet brenda mureve te shtëpisë, sidomos ne zonat rurale.

Trajtimi jo si duhet i rasteve të dhunës ndaj grave dhe në familje nga institucionet përkatëse, jo rrallë ka çuar edhe në viktima. Rasti me i fundit është shënuar në Ferizaj, ku një 18-vjeçare humbi jetën nga dhuna që ushtroi bashkëshorti i saj. Për këtë arsye, protestat kundër kësaj dukurie janë të shpeshta në Kosovë, të cilat kryesisht organizohen nga organizata që mbrojnë të drejtat e grave në vend.