Digjen Greqia e Spanja, Autoritetet: E keqja kaloi, por zjarret s’janë nën kontroll

Java ka nisur përvëluese në rajonin Aleksandropolis, në veri-lindje të Greqisë, ku disa qindra zjarrfikës janë përpjekur të shuajnë flakët agresive që kanë përfshirë masivin pyjor prej 3 ditësh. Autoritetet kanë evakuuar tre vendbanime të kërcënuara nga dy zjarre.

Ndërsa në rajonin Prodromos, në veri-perëndim të Athinës, një i moshuar humbi jetën këtë të hënë si pasojë e tymit helmues, teksa përpiqej të shpëtonte kafshët e tij nga zjarri.

Probleme janë verifikuar edhe në ishujt Kanarie të Spanjës, ku zjarrfikësit parandaluan që një zjarr masiv të arrinte zonat e banuara në Tenerife.

Për 6 ditë, një zjarr pyjor ka djegur sipërfaqet malore dhe fushore të ishullit. Flakët kanë prekur një zonë më të gjerë se 12 mijë e 800 hektarë, në një perimetër prej 90 kilometrash.

Autoritetet iberike kanë garantuar se më e keqja ka kaluar, por kanë shtuar se zjarret nuk janë ende nën kontroll të plotë.

Ndërkohë, policia spanjolle ka deklaruar se zjarret kanë qenë të qëllimshme.