Diskutoi shkarkimin e kryetarit të Rezervës Federale, Trump: Shumë e pamundur

Presidenti Donald Trump ka lënë të kuptohet se nuk ka gjasa të shkarkojë kryetarin e Rezervës Federale, Jerome Powell, vetëm disa orë pasi kishte ngritur pikëpyetje lidhur me këtë mundësi në bisedime me ligjvënës republikanë.

“Të them të drejtën, është shumë e pamundur,” u shpreh Trump të mërkurën, duke shtuar megjithatë se “nuk përjashton asgjë” dhe se Powell “nuk duhet të largohet përveçse nëse ka mashtrim”.

Komentet e presidentit erdhën pas disa ditësh tensioni të shtuara ndërmjet Shtëpisë së Bardhë dhe kreut të bankës qendrore amerikane. Trump ka kritikuar publikisht Powell për politikën monetare, duke kërkuar në mënyrë të përsëritur uljen e normave të interesit për të nxitur rritjen ekonomike. Ai ka deklaruar se Powell “po bën një punë të keqe”, pavarësisht se e emëroi vetë në vitin 2018.

Raportimet për diskutimet e Trump me republikanët rreth mundësisë së shkarkimit të Powell-it tronditën tregjet financiare. Indekset kryesore të bursave amerikane dhe dollari amerikan pësuan rënie, ndërsa investitorët u ndjenë të pasigurt për pavarësinë e politikës monetare në SHBA.

Nga ana tjetër, Jerome Powell ka deklaruar se Shtëpia e Bardhë nuk ka autoritetin për ta shkarkuar për arsye politike. Megjithëse ligji e lejon presidentin të largojë një kryetar të Fed-it për “arsye të rëndësishme”, interpretimi i kësaj dispozite mbetet i paqartë dhe nuk është testuar në praktikë.

LEXONI GJITHASHTU:

• Thatësira godet Athinën, ekspertët paralajmërojnë kolaps në furnizimin me ujë
• Rritet presioni: Izraeli godet sërish Sirinë, 3 të vrarë e dhjetëra të plagosur