Rritet presioni: Izraeli godet sërish Sirinë, 3 të vrarë e dhjetëra të plagosur

Forcat Mbrojtëse të Izraelit (IDF) kanë intensifikuar operacionet ushtarake në jug të Sirisë, duke goditur objektiva në rajonin e Suweidas dhe kryeqytetin sirian Damask. Sipas një deklarate zyrtare nga IDF, trupat izraelite po “operojnë me vendosmëri në rajonin e Suweidas” dhe po “rrisin presionin dhe ritmin e sulmeve” kundër aseteve të regjimit sirian.

Në deklaratën e bërë publike sot, një komandant izraelit konfirmoi se sulmet kishin në shënjestër struktura të rëndësishme ushtarake dhe logjistike të qeverisë siriane. Ai theksoi se “Izraeli ka goditur gjithashtu Damask dhe do të vazhdojë të godasë në rajonin jugor të Sirisë”.

Sulmet ajrore kanë shkaktuar pasoja të rënda në Damask. Sipas Ministrisë së Shëndetësisë siriane, tre persona kanë humbur jetën dhe 34 të tjerë janë plagosur. Selia e ministrisë së mbrojtjes në Damask ishte ndër objektivat kryesore të goditura.

Ndërkohë, në një reagim surprizues, Sekretari i Shtetit i SHBA-së, Marco Rubio, është shprehur optimist për një zbutje të situatës. Duke folur për mediat, Rubio tha se “mendon që Izraeli dhe Siria janë në rrugën e tyre drejt një deeskalimi të vërtetë”, duke sugjeruar se ka pasur një “keqkuptim” midis palëve. “Në orët e ardhshme, shpresojmë të shohim një përparim të vërtetë,” tha ai.

LEXONI GJITHASHTU:

• Diskutoi shkarkimin e kryetarit të Rezervës Federale, Trump: Shumë e pamundur
• SHBA-të i bëjnë thirrje Izraelit të ndalojë sulmet ndaj Sirisë