Dita e 10-të e protestës, aktivistët dhe qytetarët vazhdojnë marshimin në rrugët e Tiranës

I ftuar këtë të martë në emisionin Now me Erla Mëhillin në Euronews, profesori i kriminalistikës Ervin Karamuço u shpreh se protesta në Tiranë kundër projektit në Zvërnec, e cila sot hyri në ditën e 10-të, është një protestë e qetë, e mirëorganizuar dhe e konsideroi gjithashtu një protestë model.

Sakaq, ai u bëri thirrje protestuesve që të mos bien pre e provokatorëve dhe të infiltruarve, të cilët synojnë të krijojnë përplasje dhe ta agravojnë protestën.

“Unë i besoj zemërimit të pastër qytetar që e shikoj, që e shikoj te Marini e te shumë të tjerë që njoh nga shoqëria civile. Por ky është një ushtrim i demokracisë. Ky duhet të vazhdojë, ky zgjim i madh se si po zhvillohet duhet të vijojë.

Protesta model! Shumë të qeta, shumë të disiplinuara, shumë korrekte. I shikoj edhe në formate. Tani, gjuha e dhunës, gjuha e urrejtjes, aty do apo s’do, disa që marrin mikrofonin dhe e kanë. Por unë e shikoj më shumë virtuale gjuhën e urrejtjes. Aty njerëzit janë shumë më të kulturuar. Shikoj policinë shumë më të qetë dhe më të disiplinuar.

Ka pasur vetëm një çedim, nuk mund t’i vendosësh ti perimetër në mes të bulevardit protestuesve, duke thënë që “kemi perimetrin e sigurisë për Izraelin”, në një ditë që ishte një protestë, disi ishte e ndezur. Dhe pastaj u detyruan, hodhën ujë. Po uji ku? Te fëmijët.

Problemi është te të infiltruarit. Këtu futemi te çështjet e sigurisë, te provokatorët që duan ta prishin, rrezik ka çdo ditë edhe pa qenë. Në një protestë normale, provokatorët, të infiltruarit, njerëz për shumë qëllime të tjera përtej atyre të protestës, mundet të bëjnë eksese. E gjejnë, kanë filluar bëjnë ndonjë sherr aty-këtu, po policia i menaxhon në distancë, vetë qytetarët mundohen t’i zgjidhin e të tjerë e të tjerë. Pra ka nga këta.

Lëreni njerëzit e lirë të protestojnë. Këta që kanë axhenda të tjera në perimetër, s’kanë punë këta me protestën! Turma është e vetëkontrolluar. Nuk e kontrollon dot policia, është e vetëkontrolluar. Problemi është të mos ketë, individë problematikë me qëllime provokative që pastaj mund të kalojnë në përplasje, ku turma ose ata qytetarë do mbajnë kostot. Pra, për një apo dy persona mbahen kostot.

Kjo nuk është për të futur panik që mos dilni në protestë se do ketë. Po kjo është për të pasur vigjilencë që këta njerëz mos e infektojnë protestën. Ne duam zhvillime demokratike, por jo cenim të rendit dhe të sigurisë publike dhe kombëtare. Pra për këtë jemi ne”, u shpreh ai.

Pasi qëndruan për rreth dy orë përpara Kryeministrisë, ku të pranishmit mbajtën edhe fjalime, qytetarët ndezën dritat e telefonave dhe më pas nisën marshimin në rrugët e Tiranës.

Kjo e martë shënon ditën e dhjetë të protestës së aktivistëve dhe qytetarëve për zonat e mbrojtura.

Një protestues i ardhur nga Gjermania, i cili kishte veshur një bluzë me mbishkrimin “Diaspora është me ju”, u bëri thirrje shqiptarëve jashtë vendit dhe intelektualëve që të angazhohen më shumë në zhvillimet politike në vend.

Gjatë fjalës së tij, ai theksoi se Shqipëria i përket të gjithë shqiptarëve, pavarësisht se ku jetojnë, ndërsa u kërkoi pjesëtarëve të diasporës të bashkohen me protestën dhe intelektualëve të krijojnë një front politik kundër qeverisë.

“Shqipëria nuk është pronë private, por atdheu i gjithë shqiptarëve kudo që ndodhen. Unë e kam lënë vendin tim kur kam qenë 18 vjeç, por sot jam kthyer këtu sepse vendi ynë ka nevojë për ne. I bëj thirrje diasporës të vijë këtu me ne. U bëj thirrje gjithë intelektualëve në Shqipëri, bëni një front politik kundër. Të gjithë duhet të jenë këtu”, tha protestuesi.

Një vajzë e re, e cila kishte ardhur nga jashtë vendit për t’iu bashkuar protestës, e ka cilësuar këtë ngjarje si një moment historik.

E reja u shpreh se kjo ditë shënon fundin e një tranzicioni të tejzgjatur ndërsa theksoi se shqiptarët po tregojnë bashkim dhe dinjitet.

“Për herë të parë në 35 vite shqiptarët bëhen bashkë. Është moment historik sepse shqiptarët dëshmojnë se Shqipëria është mbi gjithçka. Për herë të parë tregojnë se nuk nëpërkëmben dot nga askush, sepse po shpaloset fytyra më dinjitoze e Shqipërisë. Sot shenjojmë fundin e tranzicionit të tejzgjatur. Sot fytyra europiane e Shqipërisë është kjo protestë, jeni ju. Sot Shqipërisë i dalim vetë për zot. Prandaj, gjej rastin të bëj thirrje për çdo shqiptar që s’është ende këtu të na bashkohet përditë në bulevard, sepse është një përjetim që i takon kujtdo që e do Shqipërinë vërtet. Uroj që Zoti ta bekojë Shqipërinë, por bekimi i Shqipërisë është kjo protestë, jeni ju”, tha ajo.

Në qytetin e Gjirokastrës, qytetarët kanë protestuar për të tretën ditë radhazi për anulimin e projektit të Zvërnecit.

Pjesëmarrësit në protestë janë mbledhur në sheshin “Çerçiz Topulli”, ndërsa risia ka qenë se në duar mbanin fotografi të patriotëve dhe dëshmorëve. Krahas mesazhit “Atdheu nuk shitet”, protestuesit kanë folur edhe për problemet ekonomike dhe sociale me të cilat përballet sot Shqipëria.

Ndërkohë, protestat po vijojnë edhe në qytete të tjera në Shqipëri, duke përfshirë Korçën, Elbasanin si dhe Tiranën, ku pjesëmarrja është më e madhe. Këtë të martë, protestat hynë në ditën e 10-të.

Pasi qëndruan për rreth 30 minuta në sheshin “Skënderbej”, protestuesit nisën marshimin drejt bulevardit “Dëshmorët e Kombit” dhe Kryeministrisë.

Gjatë marshimit, qytetarët bën thirrje ku kërkonin dorëheqjen e kryeministrit.

“Revolucion, dorëheqje, Rama jepe dorëheqjen, Edi Rama ka mbaru, ka mbaru edhe Sala dëm ka shku, dëm ka shku, Rama në burg Berisha në burg, poshtë Komunizmi” ishin disa prej thirrjeve të tyre.

Kryeministri Edi Rama, në një konferencë për shtyp me gazetarë nga vendet e Bashkimit Europian, u shpreh se vizioni për transformimin e Zvërnecit nuk do të ndalet.

Ai tha se kompania ka angazhuar njerëzit më të mirë në të gjitha fushat, ndërsa qeveria ka vendosur qartë hapat që duhet të ndiqen, përfshirë vlerësimin mjedisor dhe më pas hartimin e projektit final.

Sipas tij, në këtë fazë nuk ka ende një projekt të miratuar, por vetëm një proces dhe shprehje interesi.

Rama e cilësoi debatin publik si një sulm për të penguar një projekt përpara se të lindë, duke shtuar se kjo nuk do të lejohet.

Ai theksoi se nëse projekti do të jetë sipas standardeve dhe ambicieve të vendosura, do të vazhdojë, ndërsa në të kundërt do të kërkohet përmirësimi i tij.

“Kompania ka angazhuar njerëzit më të mirë në të gjitha fushat, ndërsa qeveria ka vendosur piketat përkatëse. Do të kryhet vlerësimi mjedisor dhe më pas do të hartohet projekti. Ky është një sulm i madh për ta “vrarë” një projekt përpara se të lindë. Këtë nuk do ta lejojmë, nuk do të ndodhë. Dhe nëse projekti do të jetë ashtu siç mendoj se do të jetë, të gjithë do ta shohin. Nëse nuk do të përmbushë ambiciet tona, do të kërkojmë që të përmirësohet. Por nuk mund t’i thuash një investimi që të mos bëhet, vetëm sepse duam ta mbajmë atë pjesë të Shqipërisë të paprekur. Në vend të kësaj, duhet parë në mënyrë serioze se cilat janë problemet dhe si mund të menaxhohen më mirë, përfshirë edhe çështjet e mirëmbajtjes së atij pylli”, tha Rama.

Kundërshtimi ndaj projektit turistik në Zvërnec dhe Sazan po zgjerohet edhe jashtë Shqipërisë. Përmes rrjeteve sociale është shpërndarë një thirrje për protestë paqësore në Stokholm të Suedisë, e planifikuar të mbahet më 13 qershor.

Sipas posterit të publikuar, manifestimi do të zhvillohet në sheshin Mynttorget, nga ora 15:00 deri në 17:00, nën sloganin “Shqipëria nuk është në shitje”. Organizatorët deklarojnë se protesta synon mbrojtjen e natyrës së mbrojtur të Shqipërisë, transparencën dhe respektimin e parimeve të shtetit të së drejtës.

Në materialin promovues përmenden në mënyrë të veçantë Zvërneci dhe Sazani, ndërsa flamingoja është përdorur si simbol i fushatës kundër projektit. Protesta vjen në një kohë kur kundërshtimet ndaj investimit kanë hyrë në ditët e tyre të njëpasnjëshme në Shqipëri dhe kanë tërhequr vëmendje edhe në diasporë.

Kryeministri Edi Rama ka zhvilluar një takim në Kryeministri me gazetarë nga vende të ndryshme të Bashkimit Europian, ku është pyetur edhe për protestat dhe ndikimin e tyre në procesin e integrimit europian.

Në përgjigje të një gazetari, Rama u shpreh se protesta të tilla nuk kanë asnjë lidhje me procesin e integrimit në Bashkimin Europian, duke theksuar se Shqipëria funksionon si çdo vend tjetër demokratik.

I pyetur nëse ka shqetësim se protestat mund të ndikojnë në perceptimin europian të vendit, Rama tha se një lidhje e tillë nuk ekziston.

“Nuk ka të bëjë fare me integrimin. Tregojmë se jemi një vend si çdo vend i BE-së”, theksoi ai.

Në vijim të debatit, kur gazetari iu referua deklarimeve të Komisionit Europian, Rama kërkoi sqarim për burimin e informacionit.

“Cili Komision ua thotë këto gjëra? Unë nuk mendoj se ka Komision që thotë se nëse vazhdojnë protestat, vendi nuk është europian. Diçka të tillë nuk e kam dëgjuar nga Komisioni Europian. Në Shqipëri protestohet si në çdo vend të BE-së”, u shpreh kryeministri.

Sipas tij, protestat janë pjesë normale e jetës demokratike dhe nuk përbëjnë pengesë për rrugën e integrimit të Shqipërisë në Bashkimin Europian.

Kryeministri Edi Rama gjatë një konference për shtyp me gazetarë nga vendet e Bashkimit Europian, përveç diskutimit që bëri për çështjen e Zvërnecit, u ndal edhe te ishulli i Sazanit.

Kreu i qeverisë u shpreh se ishulli i Sazanit nuk ka asnjë projekt, por si fillim, sipas tij, ka nevojë për një marrëveshje.

Rama u tha gjithashtu gazetarëve të BE-së se Sazani nuk po shitet dhe as nuk ka pasur përpjekje për ta blerë. Edhe nëse do të kishte, Rama u shpreh se alternativa nuk do të pranohej, sepse ishulli u përket shqiptarëve.

“Ishulli i Sazanit nuk ka nevojë për një projekt pikë së pari, ka nevojë për një marrëveshje. S’kemi marrëveshje për ishullin e Sazanit sepse po negociojmë prej 2 vitesh. Kurrë s’kanë kërkuar ta blejnë ishullin. Edhe po të kërkonin, kurrë nuk na ka shkuar ndonjëherë nëpër mend alternativa për të shitur ishullin. Marrëveshja ka të bëjë me sipërmarrjen e përbashkët mes investuesit dhe Shqipërisë. Ishulli u përket shqiptarëve, Republikës së Shqipërisë. Aty ku do të ndërtohet, do të ketë pronësi të objektit. Po negociojmë. E kuptoni pse jam, si ta them, nuk jam as i zemëruar, i frustruar deri në kockë sepse sheh gjithë këto foto, ishulli i Sazanit i ndërtuar me kulla Trump, këtej thuhet turp t’i vijë Edi Ramës. Është krejt e kundërta, po negociojmë. Shteti shqiptar do të fitojë prej kësaj. Për ishullin nuk kanë ende asnjë skicë të paraqitur sepse nuk kanë asnjë marrëveshje”, tha kryeministri Rama.