“Do i përgjigjemi dhëmb për dhëmb”, Berisha-deputetëve socialistë: Mos provokoni

Ish-kryeministri Sali Berisha tha për mediat pas mbledhjes me deputetët e PD, se ata kanë diskutuar se si do i përgjigjen “dhëmb për dhëmb” përpjekjeve të Ramës, për t’u mohuar të drejtat kushtetuese të deputetëve.

Berisha u bëri thirrje deputetëve socialist që të mos i provokojnë deputetët e opozitës, pasi këta të fundit sipas tij, po protestojnë për të drejtat kushtetuese të tyre dhe se protesta e tyre është protesta më e drejtë.

“Në mbledhjen e deputetëve u diskutua gjerësisht se si t’i përgjigjemi dhëmb për dhëmb përpjekjeve të Edi Ramës, për të vazhduar me mohimin e të drejtave kushtetuese të deputetëve në parlament. Së pari dënoj çdo provokim në kohën që ne jemi në protestë në parlament. Unë u kërkoj deputetëve socialist të mos marrin rolin e provokatorit. Nëse ne protestojmë për të drejtat e deputetit minimumi është të respektojnë protestën, kjo situatë i turpëron ata.

I pyetur se si do jetë përgjigjja dhëmb, për dhëmb,  Berisha u përgjigj se çdo gjë do jetë publike dhe se protesta e opozitës ka marrë rrugën pa kthim.

Duke komentuar konfliktin e djeshëm, deputeti Berisha tha se Sinaj tentoi të merrte fjalën ndërkohë që opozita po proteston, por ai nuk u godit.

“Ne do të vazhdojmë betejën. Do të rivendosim të drejtat tona kushtetuese. Dhunën e filloj ai tjetri, i cili për të thyer protestën tonë ju nënshtrua kryetares së parlamentit që e mbushi me gardistë parlamentit. Sinaj nuk mund të merrte fjalën në një kohë kur e gjithë opozita ishte në protestë. Të tjerat i ekzagjeruan mediat. Ai nuk është goditur. Ai nuk ishte polic aty, por ishte deputet”,-tha Berisha.

LEXONI GJITHASHTU:

• Mblidhet sot Komisioni i Etikës, kush janë 7 deputetët që kërkohet të përjashtohen
• VIDEO| Deputetët Nallbati dhe Sinaj, përplasje dhe jashtë Kuvendit