“Do na sigurojnë metalet e rralla”- Trump: Arritëm marrëveshjen tregtare me Kinën

Presidenti i SHBA-së, Donald Trump, ka deklaruar se është arritur një marrëveshje paraprake me Kinën pas dy ditësh bisedimesh në Londër mes zyrtarëve të lartë të të dy vendeve. Sipas tij, marrëveshja pret miratimin përfundimtar nga ai vetë dhe Presidenti kinez, Xi Jinping.

Në një postim në platformën e tij Truth Social, Trump tha se marrëveshja përfshin furnizimin e Shteteve të Bashkuara me metale të rralla dhe të lehtësimin e aksesit për studentët kinezë në institucionet arsimore amerikane.

“Magnetet e plota dhe çdo metal i rrallë i nevojshëm do të furnizohen paraprakisht nga Kina. Po kështu, ne do t’i ofrojmë Kinës atë që është rënë dakord, përfshirë studentët kinezë që do të përdorin kolegjet dhe universitetet tona, gjë që gjithmonë më ka pëlqyer!”, shkroi Trump.

Theks i veçantë iu vu edhe çështjes së tarifave, ku Trump sqaroi se Shtetet e Bashkuara do të mbajnë një normë totale tarifore prej 55%, ndërsa Kina do të aplikojë tarifa përkatëse prej 10%.

Ai e përshkroi gjendjen aktuale të marrëdhënieve dypalëshe si “të jashtëzakonshme”, ndërsa e mbylli mesazhin e tij duke falënderuar ata që po ndjekin nga afër zhvillimet rreth marrëveshjes.

Sekretari amerikan i Tregtisë, Hoëard Lutnick, konfirmoi se bisedimet kishin prodhuar një kornizë të re për zbatimin e marrëveshjes dhe synonin heqjen e kufizimeve mbi eksportet kineze të metaleve të rralla dhe magneteve – materiale jetike për teknologjitë moderne, nga telefonat inteligjentë deri te automjetet elektrike.

“Ne kemi arritur një kornizë për të zbatuar konsensusin e Gjenevës,” deklaroi Lutnick. “Sapo presidentët ta miratojnë, ne do të përpiqemi ta zbatojmë atë.”

Të dyja palët kanë ngritur shqetësime për shkelje të marrëveshjeve të mëparshme. SHBA akuzon Kinën për vonesa në eksportet e metaleve të rralla, ndërsa Pekini kritikon Uashingtonin për kufizimet mbi teknologjitë amerikane dhe ndalimin e vizave për studentët kinezë.

Bisedimet në Londër pasuan një telefonatë mes Trump dhe Xi më 5 qershor, që të dy liderët e përshkruan si konstruktive. Zëvendësministri i Tregtisë i Kinës, Li Chenggang, konfirmoi se të dy palët kishin arritur një konsensus për zbatimin e marrëveshjeve të mëhershme.

LEXONI GJITHASHTU:

• Trazirat në Los Angeles, Trump udhëzon agjencitë amerikane të ndërmarrin veprime
• Pse nisën tubimet në Los Angeles, Trump urdhëron futjen e Gardës Kombëtare: Rebelim