“Do nxjerrim 1 miliard euro nga administrata”, Shehaj zbulon programin e ‘Mundësisë’

Agron Shehaj, kryetar i Partisë ‘Mundësia’, ka shpalosur dy pikat kryesore ku bazohet kjo parti dhe për atë çfarë mund ti ofrojnë shqiptarëve.

Shehaj tha se fokusi kryesor është tek rritja ekonomike dhe krijimi i një shteti të vogël. Më tej ai shton se pjesë e qëllimit mbetet edhe ulja e taksave.

“Ne jemi një forcë e djathtë që besojmë tek indiividi dhe jo tek shteti. Dy shtyllat kryesore të programit tonë si parti politike janë: Çdo gjë nis nga rritja ekonomike, që do të thotë, nëse ekonomia nuk rritet me mbi 10%, Shqipëria do vazhdojë të jetë një vend i varfër.

Për rritjen e ekonomisë, duhet të kesh një platformë të qartë. Ekonominë e rrisin sipërmarrësit dhe nëse duam që të rrisim ekonominë, duhet të ulim taksat, të çlirojmë ekonominë, luftën kundër korrupsionit. Qëllimi ynë është një shtet i vogël, të zvogëlojmë kostot e administratës me 50%.

Do ta shtrydhim administratën dhe do kursejmë nga ajo të paktën 1 miliardë euro. Nëse luftohet shpërdorimi i parave publike dhe luftohet punësimi i militantëve, këtë 1 miliardë euro do ta shpërndajmë. Gjysmën e vlerës ta lëmë në xhepat e qytetarëve më taksën e sheshtë, dhe gjysma tjetër të shkojë në shëndetësi, pensione, arsim dhe ndihmë sociale”, tha Shehaj.

LEXONI GJITHASHTU:

• Paisja për bllokimin e TikTok, Karamuço: Mund të sjellë një dëm të madh
• Hakerim i e-maileve të Prokurorëve? Manjani: S’ka hakerim, i ka nxjerrë vetë SPAK-u