“Do nxjerrin thika ndaj njëri-tjetrit”-Eksperti: Pritet sherr brenda ekipit të Putin

Eksperti i Sigurisë, Avenir Peka, është shprehur se sulmi terrorist në Moskë mund të çojë në përplasje mes klaneve në Rusi.

Komentet Peka i bëri në emisionin “Now me Erla Mëhillin” në Euronews Albania, ku tha në mënyrë simbolike se anëtarët e ekipit të Putinit pas kësaj ngjarjeje do të nxjerrin thikat të godasin njëri-tjetrin.

Peka shtoi gjithashtu se brenda Rusisë ka disa klane të pushtetit, dy prej të cilave janë më kryesoret dhe presidenti Vladimir Putin është ai që ruan balancat.

“Është momenti kur presidenti sapo ka marrë një mandat dhe do rishikojë edhe ekipin e tij, sidomos edhe në fushën e sigurisë. Edhe për shkak të luftës në Ukrainë. Në mos ky është një rezultat i përplasjeve mes fraksioneve në institucionet e inteligjencës, një gjë është e sigurt se do të nxirren thikat e këtyre fraksioneve për të goditur njëri-tjetrin.

Po të shikosh strukturën e qeverisë së Rusisë, Putin nuk është ai mbreti i plotfuqishëm që vendos për gjithçka. Putin është dikush që qëndron sipër klaneve dhe fraksioneve të ndryshme, që përpiqet të krijojë balanca. Ndër vite 2 fraksionet më të rëndësishme, kanë qenë fraksioni i Leningradit që i thoshin dikur, i Shënpetërsburgut nga vjen edhe Putin vetë dhe fraksioni i Moskës, kryesisht i FSB.

Me kalimin e viteve duket se fraksioni i Petërsburgut është bërë më i fuqishëm. Ka edhe fraksione të tjera. Presidenti është ai që përpiqet të ruajë balancat. Kur ai merr një mandat tjetër është edhe momenti i duhur që ai të rishikojë ekipin. Pra ndodhja e kësaj në këtë moment që pritet të ketë lëvizje, ose është përplasje e klaneve, ose të paktën në rastin më të mirë është që ky incident do të përdoret për luftën e brendshme mes këtyre klaneve”, tha Peka.

LEXONI GJITHASHTU:

• Lukashenko: Autorët e sulmit në Moskë u përpoqën të arratiseshin në Bjellorusi
• Drejtori i FSB ruse: SHBA, Britania dhe Ukraina janë pas sulmit terrorist në Moskë