‘Do t’ju mbështes gjithmonë’, Vuçiç mesazh serbëve para protestës në Veri

Presidenti i Serbisë, Aleksandër Vuçiç u është drejtuar me një mesazh serbëve të Kosovës në prag të protestës që ata do të organizojnë këtë të enjte në Rudarë.

Përmes një postimi në rrjetet sociale, Vuçiç është shprehur se do t’i mbështesë gjithmonë serbët në Kosovë dhe u bëri thirrje që ta ruajnë paqen, sepse paqja është në interesin më të madh të tyre dhe Serbisë, shkruan N1.

“Serbët nuk kërkojnë shumë, ata kërkojnë vetëm atë që u takon të gjithë njerëzve të qytetëruar në Evropë. Ajo që të gjithë të tjerët kanë të drejtë, vetëm serbëve u mohohet, të jenë të lirë, të kenë të drejtën për të lëvizur, për të shkuar në shkolla dhe spitale, për të mbrojtur jetën dhe perspektivën e fëmijëve të tyre”, theksoi ai.

Sipas tij, serbët kërkojnë lirimin e atyre që padrejtësisht, pa asnjë arsye, janë arrestuar dhe ndaluar dhe kërkojnë tërheqjen e atyre që kanë ardhur pa të drejtë të pushtojnë veriun e Kosovës.

 

View this post on Instagram

 

A post shared by Aleksandar Vučić (@buducnostsrbijeav)

I ashtuquajturi “Shtabi i Krizës” në veri të Kosovës, i formuar nga serbët lokalë, ka ftuar qytetarët në “protestën më të madhe ndonjëherë” që do të mbahet sot në Rudare të komunës së Zveçanit.

Përfaqësues të këtij shtabi kanë bërë të ditur se organizimi i kësaj proteste ka të bëjë me deklaratat e fundit rreth barrikadave nga ana e kryeministrit të Kosovës Albin Kurti, të cilat i konsiderojnë si kërcënim, si dhe të ambasadorit të Gjermanisë në Kosovë, Joern Rohde.

Sipas tyre, Kurti ka bërë thirrje për vrasjen e serbëve në barrikada dhe zhdukjen e tyre, ndërsa ambasadori gjerman me deklaratat e tij, po e mbështet drejtpërdrejt dhe hapur kryeministrin Kurti.

LEXONI GJITHASHTU

• Serbët në Veri protestojnë sot kundër deklaratave të Kurtit dhe ambasadorit gjerman
• Policia e Kosovës po heton rrëmbimin e serbëve në Veri
• Vuçiç: Barrikadat do të largohen kur të krijohet Asociacioni