Donald Trump sërish president i SHBA, si ndikoi fitorja e tij në tregjet financiare

Aksionet e kompanive pësuan një rritje rekord në Wall Street dhe dollari kapi vlerën më të lartë në 8 vjet pasi Donald Trump u rizgjodh për të drejtuar Shtëpinë e Bardhë.

Edhe valuta kibernetike Bitcoin preku rekordin më të lartë të të gjitha kohërave, e nxitur nga premtimi i Trump se do t’i kushtojë prioritet përdorimit të valutave elektronike.

Megjithatë, investitorët janë të bindur se plani i Trump për të shkurtuar taksat dhe për të rritur tarifat do të rrisë inflacionin dhe do reduktojë ritmin e shkurtimit të normave të interesit.

Interesa më të larta për një kohë më të gjatë do të thotë se investitorët do të mund të sigurojnë përfitime më të mira nga kursimet e tyre dhe nga investimet që mbajnë në dollarë.

Valuta amerikane u rrit me 1.75 për qind kundrejt një seri valutash të ndryshme, përfshirë paundin, euron dhe jenin japonez.

Paundi britanik ra me 1.41 për qind kundrejt dollarit, në nivelin më të ulët që prej muajit gusht. Ndërsa euro u fundos me 2.24 për qind kundrejt valutës amerikane, duke prekur nivelin më të ulët që prej qershorit.

Ndërkohë, vlera e Bitcoin u rrit me 6 mijë dollarë, duke kapur kuotën më të lartë ndër vite. Qasja e Trump ndaj kriptovalutave bie ndesh me politikat e administratës Biden, që ndërmori një fushatë kundër tyre.

Gjatë eventeve elektorale, përveçse u zotua se do ta kthejë Bitcoin në superfuqinë e botës, Trump sugjeroi edhe shkarkimin e kreut të Komisionit rregullator për Këmbimin dhe Sigurinë Valutore, që ishte shprehur kundër kriptovalutave.

LEXONI GJITHASHTU:

• Trump President, deputetët e PD të ndarë për impaktin, socialistët: S’ndryshon gjë
• Zelensky: Koncesionet me Putinin, vetëvrasëse për Evropën