Drejtësia, Bushati e Haxhiu këndvështrime të ndryshme për Tahirin e Llallën

Andi Bushati dhe Baton Haxhiu ndajnë mendime të ndryshme për sa i përket çështjeve të ish-zyrtarëve të lartë dhe reformës në drejtësi.

Në emisionin Shock, me Bruna Çifligun,  Bushati këmbënguli se me rastin e ish-ministrit Tahiri reforma po tregon se ka dështuar. Ndryshe Haxhiu tha se reforma po tregon se po i ndëshkon zyrtarët e lartë dhe për këtë ai mori si shembull rastin e ish-kryeprokurorit Adriatik Llalla.

Bushati vuri në dukje se çështja e Tahirit nisi rreth një vit pas reformës në drejtësi dhe theksoi se rasti i tij është “një nga rastet tipike të dështimit të reformës”.

“Të njëjtët njerëz [ndërkombëtarë] që na thonë se reforma në drejtësi është një histori suksesi, para katër vjetësh na tregonin se po s’u dënua Tahiri nuk do të kishte sukses reforma,” – tha Bushati duke vijuar se bilanci sot anon nga ana e dështimit.

Haxhiu replikoi duke vënë në paralelizim faktin se në tërësi Shqipëria ka pasur pandëshkueshmëri të vazhdueshme. Ai mori në krahasim ngjarje të ndryshme si vrasjet e protestuesve më 21 janar 2011, apo shpërthimin në Gërdec, ngjarje për të cilat ai theksoi se nuk ka pasur ndëshkime në nivelet e zyrtarëve.

Ndëshkueshmëria aktuale sipas Haxhiut është më e mirë se pandëshkueshmëria e viteve të shkuara. Edhe pse pranoi se kanë kaluar disa vite për shqyrtimin dhe gjykimin e çështjes së Tahirit, Haxhiu e konsideroi si pozitive faktin se Prokuroria po vijon ta vazhdojë çështjen si tregues kurajoje.