Droni zbulon parcelat dhe magazinën e kanabisit në Lezhë, 2 në pranga

Një person është arrestuar nga policia e Lezhës dhe një tjetër është shpallur në kërkim me akuzën e kultivimit të lëndëve narkotike.

Burime nga policia lokale bëjnë me dije se në fshatin Gocaj, njësia administrative Balldre, rrethi Lezhë, në një ambient të mbyllur, të përshtatur si magazinë, në pronësi të shtetasit E. Gj., shërbimet e Policisë kanë gjetur dhe sekuestruar fidanë të dyshuar narkotikë të kultivuar në kubikë, bimë të dyshuara narkotike në proces tharjeje, si dhe një sasi lënde narkotike në formë boçesh.

Gjithashtu, në vijim të operacionit, në një sipërfaqe toke buzë lumit Drin, në njësinë administrative Kallmet, janë gjetur bimë të dyshuara narkotike, që dyshohet se janë kultivuar nga shtetasi E. Gj, i cili u vu në pranga.

Policia arrestoi në flagrancë shtetasin M. C., 24 vjeç, banues në Balldre, për veprën penale “Moskallëzim krimi”, si dhe u procedua penalisht në gjendje të lirë shtetasi Gj. N., 55 vjeç, banues në Gocaj, me detyrë kryetar i fshatit Gocaj, për veprën penale “Shpërdorimi i detyrës”.

LEXONI GJITHASHTU:

• Droni zbulon parcelat dhe magazinën e kanabisit në Lezhë, 1 në pranga
• Zbulohen parcela me kanabis në Himarë, në pranga dy persona