Dumani largohet nga salla e gjyqit të Metës, diplomatët britanikë vizitë në SPAK

Në Gjykatën e Posaçme po vijon seanca për dhënien e masës së sigurisë ndaj ish-presidentit Ilir Meta.

Drejtuesi i SPAK, Altin Dumani, u largua nga seanca për shkak të një takimi të planifikuar, pasi prokuroria përfundoi paraqitjen e argumenteve të saj.

Ndërkohë që është radha e kreut të PL, Ilir Meta për të dhënë deklaratat e tij në gjykatë. Në sallë janë të pranishëm edhe prokurorët Arben Kraja dhe Sotir Kllapi, që përfaqësojnë akuzën në këtë çështje.

Pas largimit nga seanca, kreu i SPAK Altin Dumani pati një takim me përfqësues të ambasadës britanike në Prokurorinë e Posaçme.

Angazhimi i trupës diplomatike dhe takimet e mbajtura në SPAK pas arrestimit të ish-presidentit, tregon interesin e madh ndërkombëtar për procesin, në kuadër të mbështetjes së reformës në drejtësi.

Ilir Meta po hetohet për tri akuza të ngritura nga SPAK:

• Korrupsion pasiv i funksionarëve të lartë shtetërorë – Meta dyshohet se ka përfituar përfitime të paligjshme gjatë kohës që ka mbajtur poste të larta publike, përmes korrupsionit pasiv, duke abuzuar me pushtetin e tij.
• Pastrimi i produkteve të veprës penale – Kjo akuzë lidhet me dyshimet se Meta ka përdorur dhe fshehur të ardhura të përfituara nga aktivitetet e paligjshme për të pastruar paratë, duke i dhënë atyre origjinë të ligjshme.
• Fshehja e pasurisë – Meta akuzohet gjithashtu për mosdeklarimin e saktë të pasurive të tij dhe të burimeve financiare, duke fshehur një pjesë të tyre nga organet e drejtësisë dhe publiku.

LEXONI GJITHASHTU:

• PD proteston në Parlamentin Europian, Korreshi: Eurodeputetët u sensibilizuan me ne
• “Të shihen operacionet e grave të prokurorëve” – Kryemadhi flet pas daljes nga SPAK