Dy dekada pushtet të Erdoganit në Turqi

Bëhen të enjten 20 vjet nga fitorja e parë elektorale e AKP-së, ose Partia për Drejtësi dhe Zhvillim, e themeluar nga presidenti aktual i Turqisë, Recep Tayyip Erdogan.

Duke siguruar mbi 34 për qind të votave, më 3 nëntor 2002, AKP u bë forca kryesore politike e Parlamentit turk, duke formuar një qeveri njëpolare.

Kryeministri i qeverisë së parë të AKP-së ishte fillimisht Abdullah Gul, që më pas do të bëhej ministër i Jashtëm dhe president i Republikës.

Edhe pse ishte kryetar i partisë, Erdogan nuk mundi të bëhej menjëherë kryetar qeverie për shkak të një dënimi që i ndalonte pjesëmarrjen në jetën politike.

Dënimi në fjalë ishte dhënë në vitin 1997, pasi Erdogan kishte recituar në publik një poezi që sipas gjykatës bënte thirrje për dhunë dhe urrejtje fetare.

I njëjti dënim i kushtoi atij edhe postin e kryetarit të Bashkisë së Stambollit, të cilin e ushtroi për 4 muaj.

Por pas disa reformash, Erdogan mundi të bëhej kryeministër në mars të 2003-shit dhe që atëherë ka qenë në krye të të gjitha qeverive të Turqisë, përveç periudhës 2014-2017, kur u zgjodh kryetar shteti nga një sistem ende parlamentar.

Ndërsa me referendumin e 2017-s, Turqia ka miratuar një sistem presidencial që i ka lejuar Erdogan të udhëheqë qeverinë si kryetar shteti.

Në 20 vjet, AKP ka mbetur partia më e votuar në Turqi, si në konteste kombëtare ashtu edhe lokale. Pak muaj më parë, Erdogan njoftoi se do të kandidojë për presidencën edhe në zgjedhjet e ardhshme, të planifikuara të mbahen në pranverën e vitit 2023.

LEXONI GJITHASHTU

• Erdogan bind Vladimir Putin, nuk pezullohet marrëveshja e grurit

• Erdogan paralajmëron referendum për mbajtjen e shamisë

• Putin bisedë telefonike me Erdogan, kërkon garanci reale nga Kievi për grurin