Një adoleshent 15-vjeçar është rrahur keq në një qytet në jug të Parisit dhe është dërguar në spital pas një arresti kardiak, në incidentin e fundit të dhunës në shkollë në Francë.

Sulmi vjen në një kohë ku është folur shumë rreth tensioneve afër shkollave franceze.

Në fillim të kësaj jave, një vajzë adoleshente u la përkohësisht në koma pasi u rrah jashtë shkollës së saj në jug të vendit.

Në incidentin e fundit, i cili ndodhi në qytetin Viry-Chatillon, që ndodhet rreth 20 kilometra (12 milje) në jug të Parisit, adoleshenti u sulmua nga disa persona teksa dilte nga shkolla të enjten pasdite.

Djaloshi i shkollës pësoi arrest kardiorespirator, tha një burim policor. Ai u dërgua në spitalin Necker, një spital i lartë pediatrik në Paris, tha Jean-Marie Vilain, kryebashkiaku i Viry-Châtillon.

Sulmuesit “u përpoqën ta masakrojnë atë”, tha Vilain, duke folur për “llojin më të keq të banditëve”. “Kjo dhunë ekstreme po bëhet e zakonshme,” shtoi ai.

Nxënësve dhe mësuesve të shkollës në të cilën frekuentonte adoleshenti do t’u ofrohet ndihmë psikologjike, tha kryebashkiaku.

Sipas një burimi policor, adoleshenti është rrahur nga disa persona të cilët më pas janë larguar. Nxënësi u gjet në një rrugë “jo larg shkollës së tij”, thanë prokurorët.

Shkolla ndodhet në një lagje të klasës punëtore të Viry-Chatillon, ku jetojnë rreth 30,000 njerëz. Deri më tani nuk është bërë asnjë arrestim.

LEXONI GJITHASHTU:

• Zyrtari i NATO: S’ka gjasa për ofensivë të afërt ruse në shkallë të gjerë në Ukrainë
• Politikani serb: Vuçiç është pajtuar për pranimin e Kosovës në KiE