Edvin Kulluri: Rizgjedhja e Bashës në krye të PD ogur shumë i keq për partinë

Kryetari i ri i Partisë Demokratike të Shqipërisë u rizgjodh sërish Lulzim Basha. Ky proces nuk kaloi pa akuza nga ish-anëtarët e partisë, që sipas tyre nuk e kanë gjetur emrin në listën e votuesve.

Ish-anëtari i Këshillit Kombëtar në selinë blu, Edvin Kulluri thotë për Euronews Albania se krahas problemeve që janë evidentuar me listat zgjedhore, kandidatët në garë kundër z. Basha nuk kishin kohë të mjaftueshme për të bërë fushatë dhe shpalosur programin për vizionin e PD-së.

“Ka pasur kohë të pamjaftueshëm prej 16 ditësh për të kryer fushatën. Nuk kemi pasur anëtarë në komisionet elektorale as në atë qendrorin dhe as ato në rrethe, por vëzhgues. Kanë trajtuar Harxhin, Kadillin dhe Shehajn si përfaqësues të OSBE brenda PD, ndërkohë duhet të kishin vetë komisionerët”, tha ai.

Sipas tij, gara e 13 qershorit ka qenë e pabarabartë dhe në shkelje të statutit të Partisë Demokratike.

“Ka qenë një garë, e pabarabartë dhe në shkelje të statutit. Kishim bindje se do kishte shtrembërim të procesit. Zhgënjimi që ka ndodhur me listat është shumë i madh”, theksoi ajo.

Rizgjedhjen e z. Basha në krye të Partisë Demokratike z. Kulluri e cilëson si lajm të keq për partinë dhe të ardhmen e saj.

“Një rizgjedhje e z. Basha është ogur shumë i keq për partinë. E ardhmja e PD nuk është e lidhur me z. Basha, por me vetë fatin e saj politik.”, tha Kulluri.