Eklipsi i diellit në Maqedoninë e Veriut, fenomeni i rrallë mahnit qytetarët

Qytetarë kureshtarë dhe të apasionuar pas shkencës në Maqedoninë e Veriut u mblodhën në sheshin e Shkupit në mesditë për të vështruar eklipsin e pjesshëm të diellit. Dhjetëra qytetarë nga të gjitha moshat shfrytëzonin teleskopët e vendosur në sheshin e kryeqytetit për të parë këtë fenomen të rrallë.

“E pabesueshme. Shumë e bukur. Një fenomen i rrallë për të cilin të rinjtë janë shumë pak të interesuar”

“Është diçka e rrallë, më pëlqeu shumë. Kam shikuar në teleskop më shumë se 20 herë dhe secilën herë emocionohesha”, – u shprehen qytetarët.

Radan Mitroviç nga Shoqata Astronomike e Shkupit thotë se errësimi i plotë është fenomen edhe më i veçantë, por që mund të shihet nga shtete të tjera.

“Ka shumë reagime pozitive, por edhe njerëz që nuk e njohin këtë fenomen dhe ne ua shpjegojmë. Njerëzit do të ishin edhe më të mahnitur po të shihnin errësimin e plotë, por për ta parë këtë fenomen duhet të shkoni në vendin e caktuar, në kohë të caktuar. Në vitin 2024 kjo do të ndodhë në Amerikë, në vitin 2026 në Spanjë, në vitin 2027 në Egjipt e kështu me radhë”- tha ai.

Ky ishte eklipsi i dytë solar për këtë vit. Hëna mbuloi pjesërisht diellin. Sipas përllogaritjeve, rreth 24% e sipërfaqes së diellit u mbulua në pikun e eklipsit.

Eklipsi mund të shihej nga Evropa, Afrika Veriore, Lindja e Mesme dhe disa pjesë perëndimore të Azisë.

LEXONI GJITHASHTU: 

• Shpëtim Nazarko: Emri i ish-ministrit të Berishës me dosje
• Juventus jashtë Champions League, Milan mban të hapur kualifikimin