Eksperti i sigurisë: Me këtë model politik është e vështirë të krijohet një polici me fytyrë tjetër

Eksperti i sigurisë, Ergys Muzhaqi, thotë se mungesa e vullnetit politik ka penguar profesionistët e Policisë së Shtetit të kryejnë siç duhet detyrën e tyre. Këtë deklaratë ai e bëri për emisionin “Now” në Euronews Albania.

“Policia i ka me të vërtetë dosjet dhe ka shumë informacion dhe është vetëm çështje vullneti,dhe kryesisht është vullneti politik, që ndikon pastaj tek profesionistët në terren”, tha ai.

Ai thekson se për sa kohë do të mbizotërojë ky model politik është shumë e vështirë të shikojmë një frymë tjetër në radhët e Policisë së Shtetit, pavarësisht faktit se kush do ta drejtojë këtë institucion pas largimit të Ardi Veliut.

“Për sa kohë që do jetë ky vullnet politik edhe ky model politik, do ta kemi shumë të vështirë. Ndoshta ka ndonjë direktivë më të fortë nga partnerët tanë strategjikë dhe atëherë shpresojmë që të këtë vend për profesionistë, sepse kemi personalitete”, tha ai.