Ekzekutimi i dy vëllezërve në Krujë, Forcat Speciale në ndjekje të autorit

As dronët që policia çoi në ajër për të lokalizuar vrasësin e vëllezërve Bardhi nuk dhanë rezultat.

Pasi braktisi mjetin në vendin e quajtur “Pompat e Ujit”, Roland Pula u largua në drejtim të paditur. Forcat Speciale vijojnë të krehin zonën ku dyshohet se mund të jetë fshehur 32-vjeçari, i cili qëlloi me breshëri automatiku mbi vëllezërit Gramoz dhe Xhentil Bardhi.

Ata ndërruan jetë rrugës për në spital si pasojë e plagëve të marra ndërsa motivet e ngjarjes dyshohet se lidhen me konflikte të vjetra mes familjeve.

Sipas informacioneve, sherri fillimisht ka nisur në një lokal të zonës dhe më tej autori i ka zënë në pritë pranë banesës.

Roland Pula njihet si person i skeduar me parë për disa vepra penale ndërsa vëllai i viktimave disa vite më parë i kishte plagosur xhaxhain.

Sipas informacioneve policore, anëtarë të familjeve ishin konfliktuar edhe herë të tjera deri mbrëmjen e së enjtes kur Roland Pula vendosi të shkrepë kallashnikovin për të marrë hak.