Ekzekutimi i ish-policit në Vaun e Dejës pasi u lirua nga qelia, pista ku po hetohet

Frrok Lleshaj është 65-vjeçari që u gjet i ekzekutuar me armë zjarri mbrëmjen e së hënës në fshatin Paçram të Vaut të Dejës në Shkodër. Mësohet se viktima ka qenë pjesë e strukturave të policisë deri në vitin 1994.

Lleshaj ka qenë i dënuar për vrasjen e kushëririt të tij, Dodë Lleshaj rreth 30 vjet më parë. Pista kryesore e hetimit mbetet ajo e një gjakmarrjeje të mundshme.

Gjykata e Shkodrës e kishte dënuar me 25 vite burgim në vitin 2006, izolim që e kishte përfunduar dy vite më parë, kur ishte liruar nga qelia.

65-vjeçari edhe pse kreu dënimin, asnjëherë nuk e kishte pranuar autorësinë e krimit.

Pas daljes nga burgu, ai ishte braktisur nga familja e tij, gruaja dhe fëmijët. Lleshaj jetonte i vetëm dhe merrej me blegtori.

Nga informacionet paraprake bëhet me dije se 65-vjeçari ka qenë duke ecur në rrugën e fshatit Paçram rreth orës 21:00 të mbrëmjes së të hënës kur është ekzekutuar.

Ka qenë një kalimtar i rastit i cili ka gjetur trupin e pajetë të Frrok Lleshajt.

Grupi hetimor po punon për sqarimin e rrethanave të ngjarjes dhe kapjen e autorit apo autorëve.

LEXONI GJITHASHTU:

• Gjendet i vrarë me armë zjarri 65-vjeçari në Vaun e Dejës, detajet e para
• Vritet shqiptari në Greqi, telefonon gruan para vdekjes e i tregon emrin e vrasësit