Emine Erdogan takohet me bashkëshortin e presidentes së Kosovës në SHBA

Bashkëshortja e presidentit turk dhe kryetare e Bordit Këshillimor të Nivelit të Lartë për Mbeturina Zero të Kombeve të Bashkuara (OKB), Emine Erdogan, u takua me Prindon Sadriun, bashkëshortin e presidentes së Kosovës, Vjosa Osmani. Lajmi u raportua nga agjencia turke Anadolu.

Emine Erdogan ndodhet në Shtetet e Bashkuara së bashku me presidentin Recep Tayyip Erdogan, ku po merr pjesë në punimet e sesionit të 80-të të Asamblesë së Përgjithshme të OKB-së. Në këtë kuadër, edhe ajo zhvillon takime dypalëshe.

Takimi me Sadriun u zhvillua në qendrën “Türkevi”, ndërsa të pranishëm ishin gjithashtu zëvendësministri i Jashtëm turk, Zeki Levent Gümrükçü, dhe përfaqësues të tjerë zyrtarë.

Në një reagim në rrjetet sociale, Emine Erdogan shkroi:

“U takova me Prindon Sadriun, bashkëshortin e presidentes së Kosovës. Gjatë takimit tonë, i cili u zhvillua në atmosferë miqësore, theksuam rëndësinë e bashkëpunimit për çështje që do të kontribuojnë në zhvillimin e marrëdhënieve midis vendeve tona. Shpresojmë që këto dialogje të ngushta do të forcojnë më tej lidhjet mes vendeve tona.”

Takimi konsiderohet pjesë e përpjekjeve për të forcuar marrëdhëniet dypalëshe dhe bashkëpunimin ndërmjet Turqisë dhe Kosovës.