EMRAT/ Ishin kthyer në “tmerrin” e bizneseve në Tiranë, arrestohen dy hajdutët

Shtetasit Soli Likrama dhe Agron Brahimi janë arrestuar nga policia e Tiranëse si autorë të dyshuar të 8 vjedhjeve në subjekte të ndryshme, të ndodhura gjatë muajve janar dhe shkurt 2023, në kryeqytet.

Të dy personat e lartëpërmendur rezultojnë me precedent të mëparshëm penal, njëri prej tyre për vjedhje.

Policia e Tiranës ka proceduar penalisht dhe një tjetër shtetas i cili dyshohet se ka përvetësuar sendet e vjedhura.

Nëm sekuestroa kanë përfunduar dhe automjeti dhe veshjet që dyshohet se janë përdorur nga autorët, gjatë kryerjes së vjedhjeve.

Materialet procedurale në ngarkim të tyre i kaluan Prokurorisë, për veprime të mëtejshme.

“Nga tërësia e veprimeve hetimore, rezultoi se këta shtetas kanë kryer një sërë vjedhjesh, në kohë dhe në vende të ndryshme, 8 prej të cilave janë zbardhur dhe dokumentuar me prova ligjore.

Shërbimet e Seksionit për Hetimin e Krimeve të Komisariatit të Policisë Nr. 2, gjatë punës hetimore, kanë dokumentuar me prova ligjore se këta shtetas, gjatë muajve janar dhe shkurt, kanë vjedhur shuma të ndryshme parash dhe sende të ndryshme, në 8 subjekte (biznese) të ndryshme, në Tiranë.

Në vijim të veprimeve, ka nisur procedimi në gjendje të lirë për shtetasin Sh. K., 41 vjeç, banues në Elbasan, për veprën penale “Përvetësimi i parave ose mallrave që rrjedhin nga vepra penale ose veprimtaria kriminale”, pasi ka përvetësuar sendet e vjedhura nga këta shtetas.

Në cilësinë e provës materiale janë sekuestruar automjeti dhe veshjet që dyshohet se janë përdorur nga autorët, gjatë kryerjes së vjedhjeve.

Në bashkëpunim me Prokurorinë, vijon puna për dokumentimin e vjedhjeve të tjera që mund të jenë kryer nga dy shtetasit e arrestuar”, thuhet në njoftimin e policisë.