Ende pa hyrë në zyrë, si Donald Trump e ka ndryshuar tashmë botën

Vetëm disa orë para betimit për mandatin e tij të dytë, Donald Trump ka nisur të formësojë ndryshime të dukshme globale. Nga Lindja e Mesme në Europë e deri në Amerikën e Veriut, Trump ka ripërcaktuar politikat dhe prioritetet e liderëve botërorë, ende pa shkuar në zyrë.

BBC ka bërë dhe një pasqyrë të ndikimeve të para të presidencës së dytë të Donald Trump:

Lindja e Mesme

Trump ka ndërhyrë në politikën e Lindjes së Mesme përpara se të rikthehet në Zyrën Ovale. Presioni i tij mbi Hamasin ka detyruar kryeministrin izraelit Benjamin Netanyahu të pranojë një marrëveshje armëpushimi në Gaza, një nismë e vendosur në tryezën e negociatave nga paraardhësi i tij, Joe Biden.
Pavarësisht kritikave, Trump ka marrë merita për zgjidhjen e krizës dhe për forcimin e aleancës SHBA-Izrael, ndërkohë që presioni ndaj palës palestineze mbetet i pandryshuar.

Mbretëria e Bashkuar

Në Londër, qeveria britanike po përgatitet për të adresuar një mandat potencialisht të paparashikueshëm të Trump. Sipas burimeve, kryeministri Sir Keir Starmer ka mbajtur takime të fshehta me ministrat e tij për të diskutuar skenarët e mundshëm. Megjithatë, strategjia mbetet e fokusuar më shumë te shfrytëzimi i mundësive sesa te reagimi ndaj deklaratave të papritura, si propozimi i diskutueshëm i Trump për të aneksuar Kanadanë.

Ukraina 

Në Ukrainë, presioni ndërkombëtar për një marrëveshje me Rusinë pritet të intensifikohet gjatë mandatit të dytë të Trump. Ndërkohë që trupat ruse vazhdojnë përparimin, luftëtarët ukrainas ndihen të pasigurt për të ardhmen.
“Do të doja që kjo të përfundonte shpejt,” thotë David, një ushtar ukrainas, “por me situatën aktuale në vijën e parë, kjo duket shumë e largët.” Megjithatë, çdo marrëveshje paqeje e mbështetur nga Trump ka të ngjarë të mos përputhet me interesat e Ukrainës.

Trazirat politike në Kanada

Në Kanada, tensionet politike janë përshkallëzuar për shkak të zotimit të Trump për tarifa 25% mbi mallrat kanadeze. Pas dorëheqjes së papritur të zëvendëskryeministres Chrystia Freeland, kryeministri Justin Trudeau njoftoi largimin e tij nga politika.
Analistët besojnë se tarifat e reja mund të ndikojnë ndjeshëm në ekonominë kanadeze, ndërkohë që vendi përballet me mungesë lidershipi në një kohë kritike.

Lufta tregtare me Kinën

Kina, megjithëse arriti objektivat e saj të rritjes ekonomike për vitin 2024, po përgatitet për një konflikt të mundshëm tregtar me SHBA. Presidenti Trump ka kërcënuar me tarifa me vlerë 500 miliardë dollarë për mallrat kineze. Kjo masë mund të trondisë ekonominë e dytë më të madhe të botës.
Megjithatë, Pekini përballet me sfida të tjera të brendshme, si kriza e pronave dhe borxhi i lartë, ndërkohë që përpiqet të ruajë stabilitetin ekonomik.

Përgatitjet për mandatin e tij të dytë sinjalizojnë se presidenca e Donald Trump mund të formësojë një peizazh të ri global në rrafshin politik.

LEXONI GJITHASHTU:

• Do firmosë 200 urdhra ekzekutivë, planet “blic” të Trump ditën e marrjes së detyrës
• Trump zotohet të publikojë dosjet e vrasjes së John F. Kennedy