Eno Bozdo: Ekonomia në vështirësi, eurobondi duhej të ishte marrë më shpejt

Shqipëria sapo ka emetuar një eurobond me vlerë 650 milionë euro me një afat maturimi prej 7 vitesh dhe me një interes 3.625%. Kryeministri, Edi Rama e ka cilësuar sukses dhe vlerësim për “librin e llogarive të shtetit” dhe se këto para do të shkojnë për të adresuar rimëkëmbjen ekonomike.

Anëtari i Kryesisë së Partisë Demokratike, Eno Bozdo thotë se, interesi është i lartë në krahasim e borxhin që ka marrë Serbia. Por sipas tij debati më i rëndësishëm është se ku do të shkojnë këto para. “Skenarë suksesi do të ishte një interes 2.7-2.8% Interesi 3.6% është mesatar dhe i ulët. Duhet të kishim dalë në kohë për borxhin dhe paratë duhet të ishin injektuar tashmë”, tha ai.

Albert Gajo, ekspert ekonomie, gjithashtu nuk e cilëson sukses, pasi interesat janë shumë të lartë dhe sipas tij do të ishte më mirë që këto para të merreshin në formën e borxhit të brendshëm pasi kështu ndihmohen investitorët shqiptarë. “Nuk mund ta quash sukses se Shqipëria i ka interesat shumë të larta. Do të gjykoja që këtë pjesë ta kishte futur në pjesën e borxhit të brendshëm pasi bankat kanë ende likuiditet”, u shpreh ai.

Sipas ish-zv. ministrit të Financave, qeveria nuk ka përcaktuar prioritete dhe situata ekonomike në vend është e rëndë në mungesë të një ndihme reale. “Situata në ekonominë shqiptare është realisht shumë e rëndë dhe asnjë plan për rimëkëmbjen nuk ekziston. Nuk mund të kemi katin e dytë kur nuk kemi katin e parë. Duhen paketa e tretë, e katër dhe e pestë. Kanë për të qenë muaj të vështirë për ekonominë tonë shtatori, tetori dhe nëntori. Nëse paratë nuk shkojnë aty ku duhet, e gjitha do të rëndojë mbi qytetarët”, shtoi Bozdo.

Eksperti, Albert Gajo në këtë kuadër shtoi se, nuk ka programe për rigjallërimin e shpejtë të ekonomisë. “Heqja e taksave për biznesin e vogël janë efekte minimaliste. Burimi i ekonomisë janë ndërmarrjet e mesme dhe të madha. Nuk ka strategji për ndërmarrjet që krijojnë rritje ekonomike”, tha ai.

Ish-zv. ministri i Financave deklaroi se programi i PD-së për ekonominë është thuajse i përfunduar por nevojitet të rishikohet për shkak të pandemisë dhe lëvizjeve në tregtinë botërore. “Plan i detajuar i ekonomisë do të prezantohet shumë shpejtë. Kriza të dëmton por ka edhe oportunitetin që të ofron”, përfundoi Bozdo.

Lexoni gjithashtu:

Eurobondi 650 mln euro, Rama: Lajm i mirë, u konfirmuam si vend i besueshëm