Environmental Performance Index 2026, Rama: Shqipëria e para në Ballkanin Perëndimor, progres i madh në 10 vite

Kryeministri Edi Rama përmes një video në “Facebook” ka zbuluar detaje nga raporti i fundit i Environmental Performance Index 2026. Rama shprehet se Shqipëria renditet e para në Ballkanin Perëndimor duke theksuar se është bërë një progres i madh në 10 vitet e fundit.

“Përshëndetje! Për javë të tëra u krijua përshtypja se Shqipëria ishte kthyer në armiken e natyrës vetë. U thanë shumë gjëra, u shkruan edhe më shumë, u ndanë miliona imazhe, akuza, gjykime dhe bindje të cekta, dhe për një çast u duk se zhurma triumfoi mbi realitetin. Por realiteti flet.

Environmental Performance Index 2026, indeksi më prestigjioz global për performancën mjedisore, sapo e ka renditur Shqipërinë të parën në Ballkanin Perëndimor, të 46-ën nga 177 vendet në botë, me progresin më të madh në rajon gjatë 10 viteve të fundit. Ndërsa për zbutjen e ndryshimeve klimatike, Shqipëria renditet e 21-ta në botë.

Dhe këto nuk janë vlerësime që ne i kemi bërë vetes, larg qoftë, por janë përfundimet e institucioneve ndërkombëtare dhe akademike të cilat prej një çerek shekulli masin me konsensus global, me të njëjtën metodologji, performancën mjedisore të vendeve të botës. Por sinqerisht, ajo që mua personalisht më gëzon më shumë sesa renditja është fakti se kjo renditje tregon rrugën që kemi bërë”, tha ai ndër të tjera.