Epidemi e pazakontë, 72 tigra të ngordhur në kopshtin zoologjik të Chiang Mai

Një shpërthim i virusit ka shkaktuar ngordhjen e 72 tigrave të robëruar në Chiang Mai, në veri të Tajlandës, duke nxitur përpjekje urgjente për të frenuar përhapjen e sëmundjes. Ekipet veterinare po dezinfektojnë mjediset e mbyllura dhe po përgatiten për të vaksinuar tigra të tjerë që kanë mbijetuar.

Shkaku i saktë i ngordhjes së kafshëve nuk është ende i qartë. Një deklaratë nga Zyra e Bagëtive e Rajonit 5 tha se kafshët ishin infektuar me virusin e murtajës së qenve, ndërsa bakteret mikoplazmatike u identifikuan si infeksion dytësor. Drejtori i përgjithshëm i Departamentit të Zhvillimit të Blegtorisë, Somchuan Ratanamungklanon, deklaroi se tigra ishin prekur nga panleukopenia e maceve, një sëmundje shumë ngjitëse që vret kafshët e egra.

Shpërthimi ka prekur dy rrethe të Chiang Mai-t: Mae Rim dhe Mae Taeng, ku dhjetëra tigra filluan të shfaqnin simptoma që më 8 shkurt. Mbretëria e Tigrave, një atraksion turistik i njohur ku vizitorët mund të prekin dhe bëjnë foto me tigra, është mbyllur përkohësisht.

Kritsayarm Kongsatri, drejtor i Zyrës së Ruajtjes së Jetës së Egër në Chiang Mai, tha se numri i ngordhjeve është “shumë i pazakontë”. Autoritetet po monitorojnë situatën me kujdes, ndërsa përvoja e mëparshme në rajon dhe në vendet fqinje ka treguar se shpërthimet e sëmundjeve tek tigra mund të jenë katastrofike për popullatat e kafshëve në kopshtet zoologjike.

Ngjarja tronditëse rrit shqetësimet për mbrojtjen e kafshëve të egra në mjedise të mbyllura dhe thekson rëndësinë e monitorimit të shëndetit të tyre për të parandaluar shpërthime të tjera të sëmundjeve.