Erdogan takim me liderët e Suedisë dhe Finlandës për anëtarësimin në NATO

Presidenti i Turqisë, Recep Tajip Erdogan do të diskutojë me liderët e Suedisë dhe Finlandës të martën, në lidhje me anëtarësimin e tyre në aleancën ushtarake të NATO-s.

Lajmin e bëri të ditur  zëdhënësi i presidentit turk, Ibrahim Kalin, shkruan Reuters.

“Do të ketë një samit në nivel liderësh me pjesëmarrjen e presidentit tonë në Madrid me kërkesë të Sekretarit të Përgjithshëm të NATO-s”, tha ai.

Kalin u shpreh se Turqia dhe vendet nordike kishin rënë dakord kryesisht për çështjet që mbajnë pezull anëtarësimin e tyre në aleancë.

Suedia dhe Finlanda aplikuan zyrtarisht për t’u bërë pjesë e NATO-s, për shkak të agresionit rus në Ukrainë.

Por Turqia ka deklaruar se nuk e mbështet anëtarësimin, pasi  akuzon dy vendet nordike se strehojnë anëtarë të Partisë së Punëtorëve të Kurdistanit (PKK).

Ky grup është konsideruar nga Turqia si një organizatë terroriste dhe pasuesit e Fethullah Gulen, të cilin Ankaraja e akuzon për organizimin e grushtit të shtetit të vitit 2016.

LEXONI GJITHASHTU

• ‘Përgjegjëse për luftën dhe krizën globale’, protesta kundër NATO-s në Madrid
• Suedia e Finlanda drejt NATO-s, si përfundoi neutraliteti i 2 shteteve