Eriksen humb ndjenjat në fushë, pezullohet ndeshja Danimarkë-Finlandë

Ndeshja Danimarkë-Finlandë u detyrua të pezullohet pasi pak përpara fundit të pjesës së parë mesfushori danez Christian Eriksen humbi ndjenjat në fushë.

Futbollisti 29-vjeçar u rrëzua përtokë teksa po kryej një rivënie anësore në minutën e 43-të.

Stafi mjekësor rendi ta asistojë, por ai nuk u kthjellua pavarësisht përpjekjeve.

Shokët e tij të skuadrës u vendosën përreth për të mos përcjellë te tifozët më të keqen, ndërsa shumë prej të pranishmëve nuk i përmbajtën lotët.

Në fushë rendi edhe bashkëshortja e futbollistit, e cila u parapri nga kapiteni i Danimarkës, portieri Kasper Schmeichel.

Përballë kësaj situate gjyqtari Anthony Taylor vendosi të ndjekë protokollet e UEFA-s dhe të pezullojë ndeshjen.