Erion Veliaj paraqitet në GJKKO, shtyhet seanca për kalimin e dosjes në gjykim

GJKKO ka shtyrë për në datën 5 dhjetor, në orën 09:00, seancën për dosjen “Veliaj”.

I pranishëm në seancën e zhvilluar këtë të martë, ku do të vendosej nëse dosja do të kalonte për gjykim ose do t’i rikthehej SPAK-ut për hetime të mëtejshme ishte dhe kryebashkiaku i Tiranës, Erion Veliaj i cili kërkoi kohë që të njihet me aktet, kërkesë e cila u pranua nga gjykata.

Veliaj tha se nuk ka pasur asnjë mundësi që të kuptojë akuzën ndaj tij dhe që të përgatitet për mbrotjen, duke shtuar se e drejta për mbrojtje efektive është shkelur brutalisht dhe në mënyrë të vazhdueshme.

Më herët, Veliaj i është drejtuar GJKKO-së për të marrë një kopje fizike të dosjes, në mënyrë që të përgatitet për mbrojtjen.

Ai argumenton se nuk i është lejuar të lexojë asnjë faqe dhe se USB-ja që iu dorëzua avokatëve nuk mund të përdoret gjatë paraburgimit.

Veliaj ndodhet në paraburgim që prej muajit shkurt dhe akuzohet për pastrim parash, mosdeklarim pasurie, korrupsion pasiv në 9 episode, shpërdorim detyre, si dhe futje të sendeve të ndaluara në qeli.

Bashkëshortja e tij, Ajola Xoxa, akuzohet për mosdeklarim pasurie, fshehje të të ardhurave dhe pastrim parash.

Më 3 nëntor, Kushtetuesja i dha të drejtë Erion Veliajt, duke e lënë në detyrë si kryebashkiak i Tiranës. Kushtetuesja rrëzoi vendimin e qeverisë për shkarkimin dhe shfuqizoi dekretin e Presidentit Bajram Begaj për shpalljen e zgjedhjeve në Tiranë.

Më 27 nëntor, ai iu drejtua sërish Kushtetueses, duke kërkuar shfuqizimin e vendimeve të GJKKO-së, Apelit të Posaçëm dhe Gjykatës së Lartë për masën “arrest me burg”.

LEXONI GJITHASHTU:

• Fjala e plotë/ Veliaj në GJKKO: Më është mohuar e drejta për t’u njohur me aktet
• Miratimi i buxhetit, SPAK refuzon prezencën fizike të Veliajt në Këshillin Bashkiak