Erion Veliaj zbulon ambicien e tij politike për pesë vitet e ardhshme

Erion Veliaj synon që të vijojë edhe për një mandat të tretë drejtimin e Bashkisë Tiranë.

Këtë synim ai e shprehu gjatë intervistës me gazetaren Ilva Tare në Euronews Albania ku tha se pas pesë vitesh e sheh veten “në fundin e mandatit të tretë si kryebashkiak”.

Veliaj u pyet fillimisht nëse kishte ambicie për të drejtuar Partinë Socialiste në rast të një humbjeje në zgjedhjet e 25 prillit, humbje të cilat do të sillnin largimin e kryetarit Edi Rama. Ai këmbënguli se “PS nuk do t’i humbasë zgjedhjet” dhe se ajo në  Tiranë  “do të fitojë edhe në bastionet e PD-së si Bërxulli apo Domjet”.

Përballë pyetjes se si do t’i ketë marrëdhëniet me Lulzim Bashën nëse ky i fundit bëhet Kryeministër, Veliaj tha se nuk e besonte që ai do të mund të bëhet kryeministër. Ai në fakt ironizoi se “Basha ka aq shanse të bëhet kryeministër sa hëna të bëhet djathë”.

“Ligji e lejon që kryetari i Bashkisë të kandidojë deri tre herë, kështu që e shoh në fundin e dytë të mandatit të tretë,” – u shpreh Veliaj duke shtuar se do ta kishte kënaqësi që të vijonte projektet e nisura gjatë dy mandateve si kryebashkiak.