Salianji: PD nuk vjen në pushtet nëse nuk ka partneritet të mirë me SHBA

Nënkryetari i grupit parlamentar të Partisë Demokratike, Ervin Salianji tha gjatë emisionit Now në Euronews Albania se PD dhe asnjë parti tjetër, nëse nuk ka partneritet të mirë me SHBA nuk mund të vijë në pushtet.

Sipas tij diskutimet që po ndodhin brenda PD janë ato që kanë ndodhur brenda çdo partie politike pas një humbjeje dhe nuk kanë lidhje me jetën parlamentare.

Ai tha se një pjesë e funksionarëve apo ish-funksionarëve të PD kanë nxitur vendimmarrje të gabuara për PD, siç është lënia e mandateve, duke iu referuar këtu ish-kryeministrit Sali Berisha.

Përjashtimi i tij nga grupi i PD, tha Salianji është i përkohshëm derisa të sqarojë pozitën e vet në gjyqin që ka nisur me DASH dhe i shërben marrëdhënieve të mira me SHBA.

Ai e cilësoi të pavend gjuhën e përdorur nga ish-kryeministri gjatë takimeve me mbështetës të tij, çka sipas Salianjit tregon të kundërtën e asaj që ai pretendon; bashkimin e PD.

“Gjithë diskutimet duhet të bëhen si të përmirësohet PD, Basha ka marrë një mandat 4-vjeçar në qershor. Unë shoh se kush po bën luftë dhe kush po rri në vetëpërmbajtje, bashkimi nuk vjen duke e tejkaluar me gjuhën. Në të gjitha rastet nuk ka përjashtim në PD, e ka thënë përfaqësuesja e SHBA, a do PD të ketë një marrëdhënie të qëndrueshme me SHBA? PD ka në qendër vokacionin perëndimor, dhe nuk ka vend me vokacion më perëndimor se SHBA”, tha Salianji.

LEXONI GJITHASHTU:

• Vetingu i politikanëve, Salianji: Kemi adresuar propozimet e ardhura nga Komisioni i Venecias