Euro 2020 një vit pas pandemisë, COVID-19 mund të rezultojë faktor ndikues te skuadrat

Për herë të parë në historinë e futbollit evropian, kampionati i përfaqësueseve zhvillohet një vit më vonë nga sa ishte parashikuar. Përveç kësaj ai organizohet në 11 qytete.

Ndryshimi u vendos në vitin 2012 dhe përfshinte edhe zgjerimin nga 16 në 24 skuadra pjesëmarrëse me një total prej 51 ndeshjesh. Ishte pandemia e COVID-19 që e detyroi UEFA-n që të shtynte kampionatin për në vitin 2021.

Gjatë kësaj periudhe shumica e ndeshjeve janë luajtur pa tifozë, ndërsa COVID-19 preku edhe futbollistët. UEFA ka përfituar nga qetësimi i situatës këtë vit për të vendosur që të gjitha ndeshjet në evropian të jenë me një numër të kufizuar tifozësh.

Ndërkohë skuadrat janë zgjeruar në 26 futbollistë, megjithatë vetëm 23 do të lejohen të listohen para çdo ndeshjeje. Si masa paraprake për COVID-19, çdo lojtar që infektohet vihet në izolim, skuadrat testohen dhe kontaktet direkte vihen në karantinë.

Ndeshjet shtyhen deri 48 orë nëse skuadrat e prekura nga COVID-19 nuk kanë minimumin 13 lojtarë në dispozicion dhe me teste negative, pas kësaj nëse nuk rezulton e kundërta takimi shqyrtohet nga Komiteti i Etikës dhe vendoset që skuadra ta humbasë ndeshjen në tavolinë 3-0.

Pikërisht COVID-19 pritet të jetë një faktor shtesë në këtë evropian dhe skuadrat kanë nisur që tani të mendojnë për strategji.