Euro-deputetja me ngjyrë, pre e dhunës policore

Një euro-deputete me origjinë afrikane ka deklaruar se është bërë viktimë e dhunës policore teksa ndodhej në duart e policisë belge.

Ligjvënësja gjermane Pierrette Herzberger Fofana, që ishte e acaruar nga trajtimi që i ishte bërë, ishte ngacmuar nga oficerët teksa po përpiqej të bënte foto nga një incident në një stacion treni në Bruksel.

“Teksa po largohesha nga stacioni i Brukselit pash 9 policë që po ngacmonin 2 të rinj me ngjyrë. Mora celularin dhe i fotografova, gjë që është e ligjshme. Më pas agjentët erdhën drejt meje dhe më morën telefonin nga duart. 4 prej tyre më shtynë brutalisht, më morën çantën, më bllokuan pas murit dhe donin të më kontrollonin. Më trajtuan në mënyrë poshtëruese”, deklaroi Fofana në një seancë të PE-së.

Presidenti i Parlamentit Evropian, David Sassoli ka kërkuar sqarime nga autoritetet belge. Policia belge ka deklaruar se ka nisur një hetim të brendshëm për incidentin.

Por ajo tha se pasi i ishin kontrolluar dokumentet, euro-deputetja ishte lënë e lirë të largohej dhe mohoi përdorimin e dhunës ndaj saj.