Farmacistja Bicja: Për fëmijët 0-1 vjeç nuk mund të jepen ilaçe pa recetë nga mjeku

Farmacistja, Alketa Bicja deklaroi se për fëmijët 0-1 vjeç nuk mund të jepen ilaçe pa recetë nga mjeku.

Në emisionin “Good Morning Albanians” në Euronews Albania, Bicja u shpreh se farmacisti nuk mund të japë çdo medikament që i kërkohet.

“Prindërit janë shumë të predispozuar që të marrin sa më tepër informacion për medikamentin që po i përdorin fëmijës, për patologjinë që ka fëmija. Ka prindër që pyesin edhe pasi largohen nga farmacia. Është përgjegjësi direkte e farmacistit.

Farmacisti nuk mund të japë çdo gjë që i kërkohet. Ligji e ka: janë të ndara medikamentet. Minimalisht, te fëmijët e grupmoshës 0-1 nuk mund të ndërhyhet pa recetë nga mjeku”, theksoi ajo.

OBSH ka ngritur alarmin për 4 shurupe për fëmijë të cilët kanë rezultuar të kontaminuara.

Katër produktet mjekësore janë solucioni Oral Promethazine, shurupi i kollës për fëmijë Kofexmalin, shurupi i kollës për bebe Makoff dhe shurupi Magrip N Cold.

Analiza laboratorike e mostrave të secilit prej produkteve konfirmon se ato përmbajnë sasi të papranueshme të dietilen glikolit dhe etilen glikolit si ndotës. Deri më sot, këto katër produkte janë identifikuar në Gambia, por mund të jenë shpërndarë nëpërmjet tregjeve informale, në vende ose rajone të tjera.

LEXONI GJITHASHTU

• Prindërit vijnë të alarmuar për fëmijët pasi lexojnë në Google, thotë pediatrja
• Mjekja pediatre: Kemi parë receta me doza të gabuara
• OBSH ngre alarmin: 4 shurupe për fëmijë nën standarde, mund të çojnë deri në vdekje