Fatmir Mediu nuk është gjykuar kurrë, thotë avokati i familjes Durda

Avokati i familjes Durda, të cilët humbën djalin e tyre 7-vjeçar nga shpërthimi i Gërdecit në vitin 2008 thotë se ish-ministri i Mbrojtjes Fatmir Mediu nuk është gjykuar asnjëherë.

Në një intervistë për Euronews Albania, Dorian Matliaj e cilësoi të drejtë vendimin e Gjykatës së Apelit për të gjykuar ish-ministrin në qeverinë Berisha.

“Ne mendojmë se Gjykata e Apelit ka marrë një vendim të drejtë, pikërisht, sepse Fatmir Mediu nuk ishte gjykuar asnjëherë. Nuk është në rastin e një gjykimi, sepse një gjykim përfundon me një vendim fajësie apo pafajësie, ndërsa Fatmir Mediu nuk është gjykuar kurrë”, tha ai.

Ai u shpreh se nuk kanë asnjë shqetësim për çdo vendim që mund të marrë Gjykata e Lartë, pasi çështja për Mediun ndodhet në Gjyakatën e Strasburgut.

“Çështja ka marrë prioritet në 2015, ka pasur një vonesë nga Gjykata e Strasburgut, por presim një vendim të shpejtë, e cila edhe ajo mund të vendosë vulën se kemi të bëjmë me një rast të pagjykuar që duhet gjykuar. Çfarëdo që të thotë Gjykata e Lartë në Shqipëri ne kemi shpresën tek Gjykata e Strasburgut që mund të mbulojë shumë thjesht çdo vendim të  p[papritur të Gjykatës së Lartë”, tha ai.

Kryetari i Partisë Repiblikane, Fatmir Mediu ishte një nga të akuzuarit për shpërdorim detyre për ngjarjen e vitit 2008 ku shpërthimi në një pikë demontimi të municioneve në Gërdec (Vorë, Tiranë) u mori jetën 26 personave.

LEXONI GJITHASHTU: 

• Gjykata pranon kërkesën e prokurorisë për të rigjykuar Fatmir Mediun