Ditën e djeshme fermerët e Maliqit u ngritën në protestë, ku kërkuan bllokimin e produkteve të ardhur nga Kosova e Serbia, pasi sipas tyre, kjo ka çuar në rënien drastike të çmimeve të prodhimit të tyre.

Por për të shpërndarë protestën, Policia përdori forma të ndryshme, nga gjobat te ‘presioni’ ndaj protestuesve.

Njëri prej fermerëve që protestoi dje, Altin Kupe, ka treguar për emisionin “Good Morning Albanians” në Euronews se është gjobitur me 250 mijë lekë të vjetra.

Ai tha se do e ankimojë vendimin dhe shtoi se gjobat ndaj fermerëve i kanë trembur ata për të protestuar sërish ditën e sotme.

“Quhem Altin Kupe, një fermer nga fshati Drithas. Dje u gjobita. Ne kërkojmë që qeveria… Ne u gjobitëm keq fare. Sepse kishim zënë jo sensin e rrugës fare, mund të ishim jashtë vijës së bardhë. Kishte gjoba nga një milionë dhe të tjera, nuk ishin njësoj. Unë e kisha 250 mijë.

Do e ankimoj. Nëse Ministria nuk i vë në dukje kërkesat tona, ne do të bëjmë një manifestim më të madh akoma.

Sot nuk besoj të dalin fermerët në protestë se janë të trembur nga gjobat. Policia kishte qëllim që t’i trembte fermerët që të mos dilnin më në protestë. Frikë kemi se shteti, policia… Atë që ta bën shteti s’ta bën njeri”, tha Kupe.

LEXONI GJITHASHTU:

• Protestuan dhe bllokuan aksin Korçë-Pogradec, gjobiten fermerët në Maliq
• Fermeri nga Lushnja: Gruri shqiptar konkurron me atë të Serbisë e Ukrainës