Festa e pranverës në Durrës, vlerësohen artistët që i kanë bërë jehonë qytetit

Për 32 vite me radhë Durrësi i ka kthyer në traditë kremtimet për festën e pranverës, një aktivitet i njohur si “Mikpritja durrsake”.

Festa me origjinë ilire organizohet për nder të solsticit pranveror dhe ka në fokus vlerësimin e figurave që i kanë bërë dhe vijojnë t’i bëjnë jehonë qytetit bregdetar.

“Kjo është festa e Pranverës, në këtë festë ne sot do të nderojmë tre muzikantë të mëdhenj të qytetit të Durrësit, të cilët janë ambasador të qytetit të Durrësit në Europë ”, tha Abdulla Deliallisi, kryetar i shoqatës organizuese “Durrësi autokton”

Gjatë programit, janë nderuar me titullin e lartë “Ambasador të qytetit të Durrësit” muzikantët durrsakë Gëzim Myshketa, Pandush Gjezi dhe Olen Çezari.

Ky i fundit, i njohur sot si violinisti shqiptar që ka interpretuar në tempujt më të mëdhenj të muzikës botërore, na tregon se, kthimi në skenën e teatrit të Durrësit, është kthim në “Olenin e vogël”, artistin e madh që prekte për herë të parë një skenë.

“Unë jam rritur në këtë vend. Këtu kam bërë koncertin e parë recital, kur kam qenë 7 vjeç, ndërsa pjesën e parë në publik e kam realizuar te skena e vogël këtu 5 vjeç”,-tha Olen Çezari, violinist

Fama e tij nuk është “rritur” e zhvilluar paralelisht me skenën ku nisi gjithçka, e cila sot duket e vogël për ta kthyer edhe një herë aty, në një shfaqje dedikuar qytetarëve të vendit që e rriti.

“Durrësi e meriton një gjë të bukur këtu në shesh. Ky teatër është shumë i vogël”,-tha Olen Çezari

Gëzim Myshketa nga ana tjetër nuk mundi të ishte i pranishëm në ceremoni, megjithatë dy fjalë i tha e ëma e tij, Shega Myshketa.

“Emocionet janë pafund, e falënderoj shumë se më ka bërë krenare. Gëzimi nuk është vetëm një artist i madh, por edhe një çun shumë i mirë për ne si prindër”, tha Shega Myshketa, nëna e Gëzim Myshketës

Pyetur nëse këtë vlerësim nga Durrësi e prisnin më herët, përgjigjja është ajo e një artisti.

“Po më mirë vonë se kurrë, se kishte mundësi edhe kurrë”, tha Shega Myshketa, nëna e Gëzim Myshketës.

LEXONI GJITHASHTU:

• Festivali i Gjirokastrës, 40 grupe polifonike fillojnë përgatitjet
• Evropa armatos me tanke Ukrainën, ushtria bëhet gati për ofensivë
• Aksidenti te “Rruga e Elbasanit”, policia arreston shoferin e autobusit