Festivali i filmit të animuar, filmi francez fiton çmimin final

Festivali i Filmit të Animuar në Anesi ka dhënë verdiktin e tij, duke vlerësuar filmin francez “Linda në kërkim të pulës”.

Me mbi 100 vende pjesëmarrëse dhe disa qindra filma të metrazheve të ndryshme të transmetuara, Anesi ka fituar statusin e vatrës së animacionit botëror.

“Ishte diçka e pabesueshme të isha këtu dhe të prezantoja filmin. Ka pasur edhe shumë presion, pasi të prezantosh një film para producentëve është diçka e veçantë”, thotë Sébastien Laudenbach, regjisor.

“Po, ky film mori formë në Anesi, që nga përgatitja e skenarit, në çdo hap ne ishim aty. Kështu që është një përfundim befasues, por ishte sipas rendit të gjërave”, shprehet Chiara Malta, regjisore.

Trofeu Kristali i Argjendtë iu dha unanimisht filmit “Linda në kërkim të pulës”. Ai rrëfen historinë e një nëne që i duhej të mbante premtimin e bërë vajzës së saj për të gatuar një pulë me speca. Argëtues, i dhimbshur dhe realist, ai ishte favorit për shumë pjesëmarrës në festival.

Çmimi i jurisë shkoi për hungarezin Aron Gauder, për filmin e tij të fuqishëm politik, “Katër shpirtrat e një ujku”, që tregon se si amerikanëve autoktonë iu mohuan tokat e tyre dhe se animacioni nuk është vetëm për fëmijë.

“Mendoj se kompani si ‘Disney’, ‘Pixar’ dhe ‘Marvels” kanë nxitur subjektin familjar, ndaj dhe mendimet e mia ishin tek familja ime. Por ka edhe shumë gjëra të tjera të cilat njerëzit duhet t’i shohin”, thotë Aron Gauder, regjisor.

Ndër vite, Festivali i Filmit të Animuar në Anesi është kthyer në një event ndërkombëtar për filmat e animuar të të gjitha zhanreve dhe formateve. Në njërën anë është krijimi, në anën tjetër fitimi; dy pole të kinemasë të bashkuara në një festival të vetëm”.

LEXONI GJITHASHTU:

• Festivali i Filmit në Venecia, aktorja Catherine Deneuve merr ‘Luanin e Artë’
• Nis festivali i filmit ‘Dea’, humanizmi tema qendrore e edicionit