FIFA dënon Serbinë për ofendimet ndaj Granit Xhakës dhe Xherdan Shaqirit

Federata Ndërkombëtare e Futbollit (FIFA) ka dënuar Federatën Serbe me 50 mijë franga, për thirrjet fyese të tifozëve në ndeshjen ndaj Zvicrës.

Në ndeshjen e Kupës së Botës në Katar, huliganët serbë kanë fyer vazhdimisht Xherdan Shaqirin dhe Granit Xhakën, dy lojtarët shqiptarë të Zvicrës.

Gjoba prej 50 mijë frangash, është dhënë për shkak të sjelljes së lojtarëve serbe në fushë, që po ashtu ishin josportive.

“Komiteti Disiplinor i FIFA-s ka sanksionuar Federatën e Futbollit të Serbisë me gjobë prej 50 mijë franga zvicerane dhe një mbyllje të pjesshme të stadiumit (prej 25 për qind), në ndeshjen zyrtare të radhës të përfaqësueses A. Dënimi është për shkelje të neneve 13 (diskriminimi) dhe 12 (sjellja e pahijshme e lojtarëve dhe zyrtarëve) të Kodit Disiplinor të FIFA”, thuhet në vendim.

Ky dënimi i dytë i FIFA-s ndaj Serbisë lidhur me qëndrimet anti-shqiptare në Botërorin në Katar. Më parë, FIFA e kishte dënuar federatën serbe me 20 mijë franga zvicerane për shfaqjen në zhveshtoren e Serbisë të flamurit diskriminues ndaj Kosovës.

Ndeshja përfundoi me rezultatin 3-2 në favor të zviceranëve, ku Xherdan Shaqiri ishte autori i golit të parë për Zvicrën.

LEXONI GJITHASHTU

• “EURO 2024′, Granit Xhaka dhe Xherdan Shaqiri do luajnë kundër Bjellorusisë në Serbi
• Xherdan Shaqiri: Doja të shënoja edhe një gol ndaj Serbisë
• Tifozja: Erdhi sigurimi për të më shoqëruar, mendova se do më gjuanin tifozët serbë