Filmi “The ring” vjen në Tiranë, përkujtohet Holokausti dhe çlirimi i kampit nazist

Është shfaqur në Tiranë filmi “The ring” i regjisorit izraelit Adir Miller i cili sjell në ekran historinë e nënës së tij, një e mbijetuar e Holokaustit.

Filmi erdhi kuadër të përkujtimit të Holokaustit ndërsa premiera u shfaq njëherësh në Nju Jork, Tel Aviv dhe Tiranë.

“Jam i lumtur që jam këtu dhe ju tregoj pse. Që fëmijë kam dëgjuar nga gjyshja e nëna historitë e asaj që ndodhi në Budapest gjatë luftës. Kur flisnin për atë kohë, tregonin se gjëja që ju dhembte më shumë në Hungari, ishte se njerëzit, kolegët e fqinjët ju tregonin nazistëve se ku fshiheshin hebrenjtë, në një bodrum apo në një shtëpi. Budapesti i përndoqi hebrenjtë, ndërsa këtu të gjithë i ndihmuan hebrenjtë”, tha regjisori, Adir Miller.

Ambasadorja e Izraelit në Shqipëri, Galit Peleg, foli për rolin e shembullin e Tiranës.

“Është privilegj që e kemi regjisorin këtu për të shënuar këtë ditë të rëndësishme. Më vjen mirë që e kemi këtë premierë në Tiranë se në Tel Aviv dhe po e vëmë Tiranën në hartë siç duhet të jetë në këtë kontekst për artin dhe historinë unike të Shqipërisë”, tha Peleg.

I xhiruar në Izrael dhe Hungari, The Ring, “Unaza” rikrijon Evropën e viteve 1940, duke ndërthurur me mjeshtëri narrativat personale dhe historike.

Ndërsa, Ministri Blendi Gonxhe, i pranishëm në aktivitetin e organizuar nga ambasada izraelite në Shqipëri, risolli në vëmendje faktin se Shqipëria është i vetmi vend evropian që strehoi të gjithë hebrenjtë gjatë Holokaustit dhe përfundoi Luftën e Dytë Botërore me më shumë hebrenj sesa filloi.

LEXONI GJITHASHTU:

• Ndahen çmimet “Golden Globes”, filmi më i mirë dramatik “The Brutalist”
• “Era dhe lisi” në DPA, filmi i Besim Sahatçiut shfaqet në Tiranë