Fitoi Nobelin për Paqen, Machado nuk do të marrë pjesë në ndarjen e çmimit

Organizatorët e çmimit Nobel kanë deklaruar se udhëheqësja e opozitës venezueliane, María Corina Machado, nuk do të marrë pjesë në ceremoninë e ndarjes së çmimit Nobel për Paqen. Organizatorët kanë theksuar se çmimin do ta pranojë vajza e saj.

Machado është parë vetëm një herë në publik që kur u fsheh në gusht të vitit të kaluar, mes një përballjeje të tensionuar me presidentin venezuelian, Nicolas Maduro. Prokurori i përgjithshëm i Venezuelës ka thënë se Machado do të konsiderohej e arratisur nëse do të largohej nga vendi për të pranuar çmimin.

Nuk ishte e qartë nëse Machado ishte apo jo në Norvegji për eventin por zëdhënësi i Institutit Nobel, Erik Aasheim konfirmoi se ajo nuk do të ishte atje.

“Do të jetë vajza e saj, Ana Corina Machado, ajo që do ta marrë çmimin në emër të nënës së saj”, tha drejtori i Institutit Nobel, Kristian Berg Harpviken.

Machado e ka akuzuar Maduron për vjedhjen e zgjedhjeve të korrikut 2024 në Venezuelë, nga të cilat ajo u përjashtua. Pretendimi i saj mbështetet nga shumica e bashkësisë ndërkombëtare.

Machado u vlerësua me çmimin Nobel për Paqen më 10 tetor për përpjekjet e saj për të sjellë demokraci në Venezuelë, duke sfiduar sundimin e hekurt të Maduros që nga viti 2013.

LEXONI GJITHASHTU:

• Protestave të fermerëve u bashkohen edhe peshkatarët, bllokohet porti i Volosit
• Tentoi të hynte në Shqipëri, arrestohet 42-vjeçari i dënuar për vjedhje në Zvicër