Fitorja e LVV në zgjedhje, Goxhaj: Albin Kurti dhe Vjosa Osmani futën në kurth opozitën

Ish-luftëtari i UÇK Dritan Goxhaj komentoi në emisionin Now në Euronews Albania fitoren e Lëvizjes Vetëvendosja në zgjedhjet e jashtëzakonshme në Kosovë një ditë më parë.

Sipas tij, Albin Kurti dhe Vjosa Osmani futën në krizë opozitën, duke e shtyrë sa mundën krizën politike, në mënyrë që data e zgjedhjeve të përkonte me ardhjen e emigrantëve për festa në Kosovë.

“Albin ‘Kurthi’ futi në kurth opozitën dhe i mashtroi, i futi në një polemizim të madh për çështjen e qeverisjes, e shtyu sa mundi krizën duke përllogaritur që data të vinte kur vijnë emigrantë nga jashtë, ishte një llogaritje e kalkuluar bashkë me Vjosa Osmanin që data e zgjedhjeve të lidhej me ardhjen e emigrantëve. Ndaj i futi në kurth, në fund i propozoi opozitës Konjufcën që opozita në vend t’ia linte topin në derë dhe ta pranonte, se atë qeverisje mund ta rrëzonte në çdo kohë, por ata e hëngrën kurthin e Kurtit dhe ai e paraqiti që këta nuk duan të bëjnë shtet, pra këta janë kundër shtetit. Ky është populizmi i Albin Kurtit, populizmi i do krizat, vetëm nga ato ushqehet dhe ai e shfrytëzoi krizën maksimalisht dhe erdhi në pikën që fitoi zgjedhjet. Nuk ishte çështja a do i fitonte, por sa do i fitonte. Opozita nuk ka asnjë lloj përfaqësimi, të tria palët dolën më vete me pretendimin që do merrnin pushtetin secili më vete, Kurti nuk pati përballë asnjë kundërshtar”, tha Goxhaj.