Fitorja e “Trumpit holandez” jehonë në qarqet ekstremiste europiane

Partitë evropiane të ekstremit të djathtë e kanë festuar atë që e kanë quajtur “era e ndryshimit”, e sjellë nga fitorja e ekstremistit Geert Wilders në Holandë.

Marine Le Pen, kryetare e partisë Bashkimi Kombëtar në Francë, ishte ndër të parat që uroi Wilders dhe partinë e tij për atë që e quajti “performanca spektakolare në zgjedhje, që konfirmoi rritjen e qëndrimit pro mbrojtjes së identiteteve kombëtare”.

Kryeministri nacionalist i Hungarisë, Viktor Orban postoi në rrjetet sociale një foto të vokalistit të grupit të rokut Skorpions për të përshëndetur “erën e ndryshimit”.

Ligjet e ashpra për emigracionin ishin zemra e fjalimeve të Wilders. Fjalë që përkonin me ato të liderit të Ligës italiane, Matteo Salvini, i cili në urimin e tij e ka quajtur Wilders një “mik dhe aleat”.

Fituesi i zgjedhjeve holandeze konsiderohet herë pas here si “Trumpi holandez”, por në fakt ai ka hyrë në politikë shumë kohë përpara ish-presidentit amerikan.

Geert Wilders e ka ndërtuar karrierën e tij duke luftuar atë që e quan “pushtimi islamik” i Perëndimit. Së fundmi, ai u shpall fajtor për fyerje të komunitetit maroken.

LEXONI GJITHASHTU:

• Fitorja e “Trumpit holandez” jehonë në qarqet ekstremiste europiane
• Kundër BE, emigrantëve dhe islamit, kush është ekstremisti që fitoi në Holandë