Flakët rrezikojnë banesat në Lazarat, zjarrfikësit ndërhyjnë për shuarjen e zjarrit

Një vatër zjarri në një sipërfaqe me barishte dhe shkurre në fshatin Kordhocë, Njësia Administrative Lazat, Gjirokastër, ka rrezikuar banesat përreth pasditen e sotme, duke alarmuar banorët dhe kërkuar ndërhyrje emergjente nga Shërbimi Zjarrfikës.

Zjarri është shfaqur rreth orës 16:10 ndërsa për shkak të erës dhe temperaturave të larta është përhapur me shpejtësi në një zonë të gjerë. Sipas burimeve lokale, flakët janë afruar në mënyrë të rrezikshme pranë disa banesave, duke krijuar frikë për dëme të mundshme materiale.

Pas sinjalizimit nga banorët, në vendngjarje kanë mbërritur forcat zjarrfikëse së bashku me një automjet të specializuar, të cilët, të ndihmuar edhe nga banorët e zonës, kanë bërë të mundur lokalizimin dhe shuarjen e flakëve në kohë.

Fatmirësisht, falë ndërhyrjes së shpejtë, është arritur të shmangen dëmet materiale dhe zjarri është vendosur nën kontroll pa pasoja për banesat apo jetët njerëzore.

Shkaqet e zjarrit nuk janë bërë ende të ditura dhe pritet që autoritetet përkatëse të nisin hetimet për zbardhjen e rrethanave të ngjarjes.

LEXONI GJITHASHTU:

• I ra bolieri në kokë, humb jetën 52-vjeçari te Myslym Shyri
• U arrestuan në Lalëz, gjykata jep masat e sigurisë për Xhevdet Plakun e 6 të tjerët