Forcimi i lekut, Banka e Shqipërisë blen 826 milionë euro

Banka e Shqipërisë ka blerë 826 milionë euro gjatë vitit të kaluar për të ruajtur një kurs të qëndrueshëm në këmbimin valutor. Pjesa më e madhe e kësaj valute është blerë jashtë planifikimit, përmes ankandeve.

Banka e Shqipërisë ka intensifikuar blerjen e eurove për të frenuar zhvlerësimin e monedhës europiane. Të dhënat tregojnë se në ankandet e planifikuara dhe në blerjet jashtë kalendarit janë blerë 826 milionë euro deri në fund të 9-mujorit të vitit të kaluar.

Në tremujorin e tretë të vitit, Banka e Shqipërisë zhvilloi shtatë ankande, në të cilat u blenë 108 milionë euro.

Në total, përmes këtij mekanizmi, blerjet e euros gjatë tre tremujorëve të parë të vitit arritën në 230 milionë euro, duke reflektuar një intensifikim progresiv të ndërhyrjeve në funksion të menaxhimit të presioneve të tregut.

Ndërkohë, jashtë kalendarit, gjatë tremujorit të tretë janë realizuar blerje të konsiderueshme, në vlerën e 596 milionë eurove. Këto ndërhyrje janë kryer në kushte të forcimit të lekut, të nxitura nga flukset e larta valutore në ekonomi, veçanërisht nga turizmi, remitancat dhe hyrjet kapitale.

Volumi i përgjithshëm prej mbi 826 milionë eurosh konfirmon një rol aktiv të Bankës së Shqipërisë në administrimin e tregut valutor.