FOTO| Momenti kur Gert Shehu mbërriti në spital

31-vjeçari Gert Shehu prej mesditës së të martës, kur sulmoi me grusht kryedemokratin Sali Berisha, është shtruar në spitalin e Traumës me hematoma të shumta në pjesën e fytyrës dhe të kokës.

Euronews Albania ka mundur të sigurojë 2 foto ku duket gjendja e 31-vjeçarit sapo mbërriti në spital, pas dhunës së ushtruar ndaj tij nga njerëzit që ruanin kryedemokratin në momentin që i riu e sulmoi.

Gazetarja e Euronews Albania Sara Demushi raportoi nga spitali i Traumës se mjekët kanë konfirmuar që dëmtimet më të shumta 31-vjeçari i ka në fytyrë dhe kokë, ndaj i është bërë edhe një skaner rezultati i të cili pritet të tregojë gjendjen e tij.

Asnjë i afërm i Gert Shehut nuk ka qenë i pranishëm në spitalin e Traumës gjatë ditë së sotme, që pas ngjarjes që u shënua pak pas mesdite në protestën e opozitës.

Ndërkohë nëna e Gert Shehut, në një intervistë ekskluzive për Euronews Albania mohoi kategorikisht deklaratat e kreut të PD Sali Berisha se i biri ishte agjent policie apo i infiltruar. Ajo tha se djali i saj kurohet prej 5 vjetësh për çrregullim bipolar, gjë që u konfirmua për Euronews Albania edhe nga mjeku i tij Sadik Lala.

LEXONI GJITHASHTU:

• Mjeku i Gert Shehut: Në gusht e rekomandova në urgjencën e psikiatrisë
• Ekskluzive| Flet nëna e Gert Shehut: Djali ka 5 vjet që mjekohet