Regjisorja nga Kosova, Blerta Zeqiri u dekorua nga shteti francez si kalorëse e “Urdhrit të Arteve dhe Letrave”. Filmat e saj, në ceremoninë e ndarjes së çmimit u vlerësuan për zërin unik, origjinal dhe të fuqishëm. Zeqiri vulosi emrin e saj në vitin 2018 me filmin “Martesa”, i zgjedhur për të përfaqësuar Kosovën në “Oscars”.

Në një ceremoni të organizuar në ambientet e ambasadës franceze në Kosovë, Zeqiri u nderua me dekoratën e veçantë për “kontributin e saj të dalluar për ekzistencën e kinematografisë kosovare të pavarur, kreative dhe të përkushtuar për të drejtat e njeriut dhe tolerancën”.

“Urdhri i Arteve dhe Letrave” u themelua në vitin 1957 për të shpërblyer njerëzit që janë shquar nga krijimet e tyre në fushën artistike ose letrare, ose për kontributin që ata kanë dhënë në Francë, por edhe në mbarë botën. Çmimi jepet në tri grada dhe ajo e kalorësit është e treta.