Franca i ofroi mbështetje logjistike Beninit për të parandaluar një grusht shteti

Franca i ka ofruar mbështetje inteligjence dhe logjistike Beninit për të ndihmuar në parandalimin e një përpjekjeje për grusht shteti që u bë tre ditë më parë në ish-koloninë franceze, thanë sot zyrtarët e kabinetit të presidentit francez Emmanuel Macron.

Zyrtarët francezë thanë se ndanë informacione me Nigerinë, e cila dërgoi avionë luftarakë dhe trupa tokësore te fqinji i saj shumë më i vogël me kërkesë të Beninit, duke ndihmuar në parandalimin e grushtit të shtetit, raporton Reuters.

“Franca ofroi mbështetje në aspektin e mbikëqyrjes, vëzhgimit dhe logjistikës për forcat e Beninit. Kjo mbështetje u ofrua si pjesë e përpjekjeve rajonale të ECOWAS”, u tha gazetarëve një këshilltar i presidentit francez.

ECOWAS është një bashkësi rajonale politike dhe ekonomike e shteteve të Afrikës Perëndimore, anëtarët e së cilës janë 12 vende të Afrikës Perëndimore.

Presidenti i Beninit, Patrice Talon, tha të dielën, më 7 dhjetor, se qeveria dhe forcat e armatosura të vendit të Afrikës Perëndimore penguan një grup ushtarësh rebelë që u përpoqën ta rrëzonin nga pushteti.