Autoritetet franceze njoftuan të premten se vendi do t’i japë fund kufizimeve të vizave për shtetasit e Marokut.

Një lajm i tillë u bë i ditur nga ministrja e Jashtme e Francës, Catherine Colonna, pas bisedimeve me homologun e saj maroken Nasser Bourita, në Rabat; dhe kjo lëvizje do të thotë se Franca nuk do të kufizojë më numrin e vizave të dhëna për marokenët.

Franca njoftoi vitin e kaluar se do të shkurtonte numrin e vizave të lëshuara për shtetasit e Marokut, Algjerisë dhe Tunizisë pasi këto vende refuzuan të merrnin mbrapsht shtetasit e tyre që jetonin ilegalisht në Francë.

Por Reuters raporton se Franca ka marrëdhënie më të ngrohta me Marokun sesa me dy vendet e tjera, Algjerinë dhe Tunizinë.

I njëjti burim theksoi se përmirësimi i marrëdhënieve mes Francës dhe Marokut vjen vetëm dy ditë pasi dy vendet luajtën me njëri-tjetrin në Botërorin e Katarit. Ndeshja u fitua nga Franca dhe kjo i dha një shikueshmëri më të mirë lidhjeve të gjera midis Francës dhe Marokut, si dhe shtetasve të tyre.

Meqenëse Maroku nuk ka arritur ende një marrëveshje për liberalizimin e vizave me shtetet anëtare të zonës Shengen, qytetarëve të tij i kërkohet të marrin një vizë në mënyrë që t’u lejohet hyrja në bllok.

Një vizë Shengen është një vizë me qëndrim të shkurtër, që u lejon mbajtësve të saj të udhëtojnë në BE për qëndrime deri në 90 ditë brenda një periudhe 180-ditore.

LEXONI GJITHASHTU:

• 31-vjeçarja e plagosur tregon momentet e tmerrit: Dy shqiptarët ishin para meje
• Aida Shtino për librin: Gjyshja ime gjirokastrite ka ndikuar shumë në formimin tim
• Daçiç: Çekia s’do ta vendosë në procedurë kërkesën e Kosovës për anëtarësim në BE